Foto: polisia.kz
Alaıaq áleýmettik jelilerde shetelge tıimdi baǵada bılet alyp beremin dep jarnama jasaǵan. Ol 70-ke jýyq adamdy aldap, árqaısysynan 200 myńnan 500 myń teńgege deıin qarjy jınaǵan. Jábirlenýshiler týr joldamalary jalǵan ekenin áýejaıǵa kelgende bir-aq bilgen. Sebebi, qaskóı klıentterge jalǵan elektrondy bılet pen túbirtek joldap otyrǵan.
Nura aýdany prokýratýrasy qoǵamdyq múddelerdi qorǵaý bóliminiń prokýrory Raıymbek Ulyqbanovtyń aıtýynsha, aldanǵandardyń arasynda eresekter de, balalar da bar. Alaıaq bıletterdi naryqtaǵy baǵadan arzan usynyp, olardy arnaıy arnalar arqyly satyp alamyn dep sendirgen.
Quqyq qorǵaý organdarynyń jedel áreketiniń arqasynda kúdikti ustalyp, barlyq jábirlenýshige keltirilgen shyǵyn tolyq ótelgen. Sot úkimimen alaıaq 3 jyl 6 aıǵa bas bostandyǵynan aıyrylǵan.
Aıta keteıik, quzyrly organdar turǵyndardy týrıstik qyzmetterdi satyp almas buryn týroperatordyń lısenzııasy bar-joǵyn tekserýge shaqyrady. Qazirgi ýaqytta Qazaqstanda resmı tirkelgen 700-ge jýyq týrfırma bar. Olardyń tizimin «Týrkod» qosymshasy arqyly tekserýge bolady. Qosymshada týrfırma ataýyn nemese satyp alǵan joldamanyń týrkodyn engizip, kompanııa týraly tolyq aqparat alýǵa bolady.
