Abaı oblysy – aýyl sharýashylyǵy salasynda áleýeti joǵary óńirlerdiń biri. Oblystyń agroónerkásiptik kesheni negizinen ósimdik jáne mal sharýashylyǵyna baǵyttalǵan. О́ńirdegi egistik alqaptardyń basym bóligi dándi jáne maıly daqyldar. Astyq daqyldary arasynda bıdaı men arpa negizgi oryn alady. Keıingi jyldary maıly daqyldarǵa, ásirese kúnbaǵys pen rapsqa degen suranystyń artýyna baılanysty, olardyń egis kólemi de ulǵaıyp keledi. Bul daqyldardan alynatyn ónimder ishki naryqty qamtamasyz etip qana qoımaı, eksportqa da shyǵarylady.
Oblystyq Aýyl sharýashylyǵy basqarmasynyń basshysy Ertaı Qýanbaevtyń málimetinshe, kóktemgi egis jumystary barlyq aýdandarda bastalǵan. Oǵan 12 900 tehnıka jumyldyrylǵan. Bıyl oblysta 753,1 myń gektar alqapqa aýyl sharýashylyǵy daqyldary egilmek. Bul ótken jylmen salystyrǵanda 3,6 myń gektar artyq. О́ńirdiń egis alqaptaryna 46,2 myń tonna tuqym daıyndalǵan. Oblystyń aýyl sharýashylyǵy taýaryn óndirýshilerine 27,5 myń tonna arzandatylǵan dızel otyny bólindi. Biraq Úrjar, Borodýlıha, Kókpekti, Besqaraǵaı aýdandarynda mıneraldy tyńaıtqyshtardy engizý kórsetkishi tómen. Alaıda Jańasemeı, Maqanshy jáne Borodýlıha aýdandaryna «Keń dala» baǵdarlamasy sheńberinde dıhandarǵa kóktemgi egis pen kúzgi jıyn-teringe jeńildikpen beriletin nesıe jumysy qolǵa alyndy.
Máselen, jýyrda Abaı oblysynyń ákimi Berik Ýálı jumys saparymen Borodýlıha aýdanyna baryp, óńirdegi iri agroqurylymdardyń biri – «Lazarev ı K» jaýapkershiligi shekteýli seriktestiginiń kóktemgi dala jumystary barysymen tanysty. Aımaq basshysy sharýashylyqtyń egis alqabyn aralap, aýyl sharýashylyǵy óndirisindegi ozyq tehnologııalar men jańa tásilderdiń qoldanylýyna nazar aýdardy. Qazir seriktestik ósimdik jáne mal sharýashylyǵyn qatar damytyp otyr. Jalpy ıeliginde 13 myń gektardan astam jeri bar qurylymnyń 10 myń gektaryna jýyq bóligine bıyl egin salynbaq.
«Sharýashylyq maıly daqyldardy óńdeýge basymdyq berip, kúnbaǵys maıyn Qytaıǵa eksporttap keledi. Bıylǵy kóktemgi naýqanda 4 000 gektarǵa kúnbaǵys, 6 00 gektarǵa zyǵyr jáne raps egý josparlanǵan. Atalǵan daqyldardyń sapasyn arttyrý úshin dron arqyly sebý tásili alǵash ret synaqqa engizildi. Sharýashylyq keler jyly kóktemgi ylǵal tolyq ketpeı turyp, dál osy ádispen raps egýge nıetti. Sonymen qatar usaq dándi daqyldardy sebýge arnalǵan jańa tehnıka satyp alynǵan», deıdi seriktestik mamandary.
Olardyń aıtýynsha, seriktestikte mal sharýashylyǵy baǵyty da qarqyndy damyp keledi. Onda sút óńdeý maqsatynda 420 saýyn sıyr alǵan. Jalpy1 500-ge jýyq iri qara mal bar. 100 adam turaqty jumyspen qamtylǵan. Tuqymdyq óńdeý men organıkalyq tyńaıtqysh engizý júıesi de jolǵa qoıylǵan. Qytaı mamandarymen birlesip kúnbaǵys býdanyn alý jumystary júrgizilip jatyr.
Bıyl Borodýlıha aýdanynda jalpy kólemi 320 myń gektarǵa dándi jáne maıly daqyl egý josparlanǵan. Bul – óńirdiń agrarlyq áleýetiniń joǵary ekeniniń aıqyn kórinisi.
Abaı oblysy,
Borodýlıha
