Konferensııanyń basty taqyryby – óńirlik jáne ulttyq klımattyq sharalardy tabysty júzege asyrý úshin klımattyq qarjylandyrý kózderin tıimdi jumyldyrý. Bul – qazirgi tańda Ortalyq Azııa elderi úshin ortaq syn men ortaq jaýapkershilikke aınalǵan baǵyt.
Jıynǵa bes memleketten – Qazaqstan, Qyrǵyzstan, О́zbekstan, Tájikstan jáne Túrikmenstannan kelgen 200-den astam sarapshy, sonyń ishinde úkimettik qurylymdar, parlamentter, halyqaralyq uıymdar, qarjy ınstıtýttary, ǵylymı mekemeler men azamattyq qoǵam ókilderi qatysyp otyr. Bul – ekologııalyq kún tártibiniń keń aýqymyn, sondaı-aq oǵan degen jan-jaqty múddelilikti ańǵartady.
«OAQО́K-2025» BUU-nyń Klımattyń ózgerýi jónindegi negizdemelik konvensııasy taraptarynyń 29-shy konferensııasynda (COP29) qabyldanǵan sheshimderdi óńirlik deńgeıde iske asyrý máselelerine basymdyq berdi. Sonymen qatar aldaǵy COP30 konferensııasyna daıyndyq, ulttyq beıimdelý josparlaryn naqtylaý jáne jańa Ulttyq Deńgeıde Aıqyndalatyn Úles (UDAÚ 3.0) ázirleý barysyndaǵy ilgerileýdi baǵalaý jaıy da egjeı-tegjeıli talqylanyp jatyr.
Konferensııa barysynda strategııalyq ári ádiletti klımattyq qarjylandyrýdyń jańa tásilderin ázirleý, sondaı-aq Jańa ujymdyq sandyq klımattyq qarjylandyrý maqsaty (NCQG) aıasyndaǵy óńirlik ustanymdar da ortaǵa salyndy.
Qazaqstandyq delegasııany Ekologııa jáne tabıǵı resýrstar vıse-mınıstri Murat Oshýrbaev bastap bardy. Delegasııa quramyna memlekettik qurylymdarmen qatar, ǵylymı-zertteý ınstıtýttary men úkimettik emes uıymdardyń, sondaı-aq Parlamenttiń ókilderi kirdi.
Vıse-mınıstr óz sózinde 2026 jyly Qazaqstanda ótedi dep josparlanǵan О́ńirlik klımattyq sammıtke erekshe toqtalyp ótti. Bul bastamany elimiz óńirlik únqatysýdy kúsheıtýdiń jáne birlesken is-qımyldardy úılestirýdiń mańyzdy tuǵyry retinde qarastyrady.
Sonymen qatar, Qazaqstan tarapy konferensııa aıasynda «Jasyl kópir»: UDAÚ iske asyrýdy jedeldetý men nyǵaıtýǵa arnalǵan ınnovasııalyq tehnologııalar» atty arnaıy sessııa uıymdastyrdy. Mundaǵy basty maqsat – óńirlik áriptestikti jańa deńgeıge shyǵarý jáne Green Bridge Partnership Program (GBPP) platformasy arqyly klımattyq tehnologııalardy engizý joldaryn naqtylaý.
Konferensııanyń taǵy bir mańyzdy qyry – ár eldiń ulttyq basymdyqtaryn óńirlik klımattyq arhıtektýramen úılestirý. Tómen kómirtekti damý jolyna túsý tájirıbelerimen almasý arqyly Ortalyq Azııa elderi birin-biri tolyqtyryp, ortaq klımattyq múddeler aıasynda ózara yqpaldastyqty nyǵaıtady.
