Jańa saýda ókildigi Dýbaıdaǵy Expo City Dubai aýmaǵynda ornalasqan Qazaqstan pavılony bazasynda jumys isteıdi. Jalpy aýmaǵy 3 420 m² bolatyn nysannyń 2 415 m²-i tolyqqandy fýnksıonaldyq keńistik retinde jabdyqtalǵan. Munda zamanaýı keńseler, kópfýnksıonaldy iskerlik aımaqtar, kórme galereıasy, meıramhana men qoımalar ornalasqan. Bul alań eksportty ilgeriletý men saýda logıstıkasy úshin keshendi platforma qyzmetin atqarmaq.
QazTrade Dubai-dyń basty maqsaty — qazaqstandyq ónimderdi Parsy shyǵanaǵy naryǵyna beıimdep, turaqty ári tıimdi ótkizý arnalaryn qalyptastyrý. Bul rette óńirlik ókildik kelesi baǵyttar boıynsha jumys júrgizedi:
-
ónimdi naryq talaptaryna beıimdeý;
-
tehnıkalyq jáne saýda kedergilerin eńserý;
-
memlekettik qoldaý quraldaryn iske asyrý;
-
syrtqy saýdadaǵy memleketaralyq ózara is-qımyldy keńeıtý.
Sonymen qatar, pavılonda otandyq óndirýshilerdiń turaqty shoý-rýmy, B2B-kezdesýler, saýda mıssııalary men salalyq is-sharalar ótkizý josparlanǵan. Arnaıy qurylǵan shtab eksporttaýshylarǵa logıstıka, marketıng, ónimdi beıimdeý men brend jyljytý baǵytynda naqty kómek kórsetpek.
BAÁ men Parsy shyǵanaǵy elderiniń naryǵy – ımportqa shekteý qoımaıtyn, biraq joǵary sapa men básekege qabilettilikti talap etetin naryq. Bul óńirde azyq-túlikten bastap ónerkásiptik taýarlarǵa deıingi keń aýqymdy ónim túrlerine suranys joǵary. Sol sebepti, qazaqstandyq taýarlardyń alýan túrin eksporttaýǵa mol múmkindik bar.
QazTrade málimetinshe, 2023 jyly Qazaqstannan BAÁ-ge eń kóp eksporttalǵan taýarlar mynalar boldy:
-
Kúmis – $55,2 mln (42,1%);
-
Sýtegi jáne ınertti gazdar – $13,1 mln (10%);
-
Qoı men eshki eti – $8,1 mln (6,2%);
-
Bolat prokaty – $5,2 mln (4%);
-
Keptirilgen burshaq kókónisteri – $4 mln (3,1%);
-
Iаhtalar men júzý quraldary – $3,5 mln (2,7%);
-
Azotty tyńaıtqyshtar – $2,9 mln (2,2%);
-
Suıyq sorǵylar – $2,7 mln (2%);
-
Qoj maqta – $2,4 mln (1,8%).
QazTrade Dubai óńirlik ókildiginiń ashylýy – Qazaqstannyń syrtqy ekonomıkalyq strategııasynyń mańyzdy kezeńi. Bul qadam Parsy shyǵanaǵy naryǵyna otandyq ónimderdiń júıeli jáne sapaly enýin qamtamasyz etip, el eksportynyń geografııasyn keńeıtýge jol ashady.
Jańa alań – tek saýda ókildigi ǵana emes, memleket pen bıznestiń kúsh-jigerin toǵystyratyn halyqaralyq ekonomıkalyq yntymaqtastyq ortalyǵy retinde qyzmet etedi.
