Foto: Azamat Qanapııa
Jıynǵa Aqjaıyq aýdanynyń ákimi Murat Serdalın, oblys ákiminiń áıelder isi jónindegi keńesshisi Jansulý Tóremuratova, oblystyq qoǵamdyq damý basqarmasy basshysynyń orynbasary Gúljanar Shókeeva, analar keńesiniń músheleri, ustazdar men aýyl turǵyndary qatysty.
Analar kúni men Halyqaralyq otbasy kúnine oraı uıymdastyrylǵan shara otbasy qundylyǵyn dáripteý, qoǵamda ana mártebesin kóterý, urpaq tárbıesiniń mańyzyn arttyrý sekildi mańyzdy taqyryptardy talqylady. Forým qonaqtary áýeli aýdan ortalyǵyndaǵy «Aqbota» balabaqshasyn aralap, mekemeniń halqymyzdyń salt-dástúri, otbasy qadirin aıshyqtaıtyn jumysymen tanysty.
«Ardaqty ana, ǵazız qaryndas, adal jardy qasterleý, sol arqyly otbasynyń berik negizi bolar otanasyn tárbıeleý – halqymyzǵa tán qasıet. Táýelsiz memleketimizdiń berik bolýy, jasampaz urpaqtyń ósip-jetilýi – shańyraqtyń shattyǵyn ustaıtyn áıeldiń arqasy. Búgingi is-shara áıel-analardyń belsendiligin arttyryp, otbasy qundylyǵyn dáripteı túsedi dep senemin. Ortaq maqsatymyz – baqytty otbasy, berekeli qoǵam, ulaǵatty urpaq tárbıeleý úshin bir bolaıyq!», dedi aýdan ákimi Murat Amangeldiuly.
Forým qonaqtary «Ańyz bolǵan analar» atty rýhanı kórmeni tamashalap, ultymyzdyń tarıhynda uly isterge muryndyq bolǵan ataqty analardyń beınesimen jaqyn tanysty. Aýdandyq ortalyqtandyrylǵan kitaphanalar júıesi uıymdastyrǵan kórmede Tumar patshaıym, Qyz Jibek, Abaıdyń ájesi Zere, kúı anasy Dına, Jubandaı jasyn uldy qazaqqa syılaǵan Zerip ana, batyr qyzdar Álııa, Mánshúk pen Hıýaz, «Qazaqtyń Narqyzy» atanǵan Qalamqas jaıynda halyqqa mol derek berildi.
Sahna tórine shyqqan spıkerlerdiń árqaısysy ómirlik tájirıbesimen bólisip, otbasyndaǵy tárbıe, ana meıirimi men jaýapkershiligi, onyń qoǵamǵa tıgizer yqpaly jóninde oı qozǵady. Jansulý Meńeshqyzy otbasy qundylyǵynyń mańyzyn atap ótse, Gúljanar Bolatqyzy genderlik teńdik, ana mártebesi jáne áıeldiń qoǵamdaǵy orny jóninde baıandama jasady. Ana men balany qoldaý, otbasy ınstıtýtyn nyǵaıtý úshin memleket tarapynan jasalyp jatqan baǵdarlamalar jaıynda aqparat berildi.
Bazarsholan aýylynan kelgen eńbek ardageri, kópbalaly ana, aýyldaǵy analar keńesiniń tóraıymy Orynsha Ermuqanova óz sózinde qyz bala tárbıesine, ulttyq salt-dástúrdi saqtaý men nasıhattaýǵa erekshe toqtaldy. Al Abaı atyndaǵy mektep-gımnazııanyń oqý isi jónindegi orynbasary Ásel Ermentaeva tárbıeniń bastaýy otbasynda ekenin myǵym aıtyp, bilim oshaǵyndaǵy sony bastamanyń nátıjesi jónindegi oıyn ortaǵa saldy.
Shara sońynda ulaǵatty analar men ónegeli otbasylar oblystyq qoǵamdyq damý basqarmasynyń alǵys hatymen marapattaldy. Olardyń qatarynda Bazartóbe aýylynan Sálimovtar, Jańabulaq aýylynan Sársenovtar, Býdarınnen Tilegenovtar otbasy boldy.
