Qyzylordadaǵy Qorqyt ata ýnıversıtetinde eki ortalyq ashyldy

ASTANA. 20 maýsym. Qorqyt ata atyndaǵy Qyzylorda memlekettik ýnıversıtetinde «Nazarbaevtaný» ǵylymı-oqý jáne «Máńgilik El» oqý-tárbıe ortalyqtary ashyldy. Bul týraly egemen.kz habarlady. Atalǵan ortalyqtar Elbasynyń bes ınstıtýsıonaldyq reformany júzege asyrý jónindegi «100 naqty qadam – barshaǵa arnalǵan qazirgi zamanǵy memleket» atty ulttyq josparyn, sondaı-aq, elimizdiń «Máńgilik El» ulttyq ıdeıasyn júzege asyrý maqsatynda ashylyp otyr. «Nazarbaevtaný» ǵylymı-oqý ortalyǵy ýnıversıtette 2014 jyly qurylǵan «Qazaqstan halqy assambleıasy» kafedrasyna qarasty «Elbasy jáne Táýelsiz Qazaqstan» oqý-kórme zaly janynan qoǵamdyq negizde quryldy. Ortalyqtyń basty maqsaty – Elbasynyń el táýelsizdigin baıandy etýdegi, halyqaralyq arenada Qazaqstannyń bedelin arttyrýdaǵy eren eńbegin nasıhattaý. Al «Máńgilik El» oqý-tárbıe ortalyǵynyń maqsaty – ulttyq sana-sezimi, azamattyq, otansúıgishtik qasıetteri joǵary, ult mádenıetin damytý men saqtaýdaǵy jaýapkershilikti sezine biletin, tarıhı oı-óresi jetilgen, ózge mádenıet ókilderimen júıeli suhbat qura alatyn jastardy tárbıeleý bolyp tabylady. «Máńgilik El» oqý-tárbıe ortalyǵy «Pedagogıka jáne psıhologııa» kafedrasy janynan qoǵamdyq negizde ashyldy. Talǵat Raıymbek. Derek: egemen.kz. Sýret: akmeshit-zhastar.kz.