Biraq qoǵam dertin joıý úshin eldiń árbir azamaty birlesip osy keselmen kúresýge kúsh biriktirýi qajet. Osy oraıda respýblıkanyń úshinshi megapolısinde atalǵan máseleni kún tártibine shyǵaryp úlken talqylaýǵa salǵan mańyzdy jıyn boldy. Ol Shymkenttegi H.Dýlatı atyndaǵy №8 mektep-gımnazııasynda ótkizildi. Jıynda kóterilgen másele bilim berý júıesindegi sybaılas jemqorlyq táýekelderin anyqtaý jáne onyń aldyn alý taqyrybyna arnaldy. Qoǵamda ózekti bolǵan bul basqosýda sarapshylar, mamandar bilim berý salasyndaǵy quqyq buzýshylyqtar men olardyń sebep-saldary jóninde keń aýqymdy talqylaý uıymdastyrdy.
Atalǵan is-sharaǵa Shymkent qalasy ákiminiń orynbasary Sársen Quranbek pen respýblıkalyq Sybaılas jemqorlyqqa qarsy is-qımyl agenttiginiń Shymkent qalasy boıynsha departamentiniń basshysy Qanat Súleımenov qatysty. Sonymen birge basqosýǵa 300-ge jýyq mektep, balabaqsha, kolledj jáne qosymsha bilim berý uıymdarynyń basshylary shaqyryldy.Kezdesý barysynda bilim berý salasyndaǵy qarjylyq quqyqbuzýshylyqtar, olardyń qoǵamǵa tıgizer keri áseri jóninde keńinen áńgime qozǵaldy.
Jıynda sóz alǵan Shymkent qalasy bilim basqarmasynyń basshysy Gúlnaz Súleımenova bilim berý salasynda kópshilikti tolǵandyrǵan ózekti máselelerdi qozǵady. Onyń ishinde birinshi kezekte sybaılas jemqorlyq qylmysyn atap ótti. Shymkenttiń bas pedagogi sondaı-aq óz baıandamasynda barlyq bilim berý uıymdarynyń basshylary qarjylyq tártipti saqtaý kerektigin, paraqorlyqpen kúrestiń tıimdi joldarynyń biri móldirlik pen ashyqtyqty qamtamasyz etý ekenin eske saldy. Sonymen birge bilim salasynda jemqorlyqqa ákep soqtyratyn jaǵdaıattardy tizip atap, olardy boldyrmaýdyń joldaryn usyndy.
Al sybaılas jemqorlyqqa qarsy kúres qyzmeti ókilderiniń sózinshe antıkordyń osy salada biraz qylmystardyń betin ashyp derekterdi anyqtaǵan. Máselen onyń ishinde keıbir bilim berý mekemelerinde bıýdjet qarajatyn maqsatsyz paıdalaný, onyń ishinde jumys istemeıtin tulǵalarǵa jalaqy tóleý jáne jekelegen qyzmetkerlerdiń eńbekaqysyn zańsyz arttyrý faktileri bar. Osy tárizdi quqyqbuzýshylyqtardyń aldyn alý maqsatynda Shymkent qalasy ákimdigi men Sybaılas jemqorlyqqa qarsy qyzmet birlesken is-qımyl josparyn ázirlep, ony birazdan beri júzege asyrý ústinde.
Joǵaryda aıtqanymyzdaı bilim salasy jyl saıyn quqyq qorǵaý organdarynyń nazaryna iligip otyrady. Aıtalyq osydan eki jyl buryn sot úkimimen qalalyq bilim basqarmasynda qyzmet istegen 2 azamat sybaılas jemqorlyq qylmysy boıynsha sottalǵan. Olardyń jekemenshik mektepke deıingi mekemelerdi teksermegeni úshin 100-500 myń teńgege deıingi somada dırektorlardan para alyp kelgeni belgili boldy. Sonymen birge ótken jyly qaladaǵy mektepterdiń biriniń esepshisi alaıaqtyq jolmen aqsha jymqyryp memleketke 64 mln teńge kóleminde shyǵyn ákelgen. Onyń da qylmysy tolyq dáleldenip, sot úkimimen 8 jylǵa bas bostandyǵynan aıyryldy.
ShYMKENT
