Jeńimpazdardy marapattaý saltanatyna «AMANAT» partııasynyń Atqarýshy hatshysy Dáýlet Káribek, Premer-Mınıstrdiń keńesshisi Eraly Toǵjanov, Almaty oblysynyń ákimi Marat Sultanǵazıev, Qaraǵandy oblysy ákiminiń orynbasary, «JORYQ» at sporty federasııasy qamqorshylyq keńesiniń tóraǵasy Álibek Áldeneı, Ulttyq sport qaýymdastyǵynyń prezıdenti Erkebulan Ilııasov jáne «JORYQ» at sporty federasııasynyń prezıdenti Baqytjan Turlybekov qatysty.
«AMANAT» partııasynyń Atqarýshy hatshysy Dáýlet Káribek ulttyq sport túrlerin damytý – bul tek qazaqtyń salt-dástúrin saqtaý jáne mádenı murany nasıhattaý ǵana emes, sonymen qatar jas urpaqty tárbıeleýdiń mańyzdy tetigi ekenin atap ótti.
«Memleket basshysy Qasym-Jomart Toqaev Ulttyq quryltaıdyń IV otyrysynda Qazaqstan kóshpendiler órkenıetiniń besigi, damyǵan ortalyǵy ekenin, túrli halyqtar men mádenıetterdi biriktiretinin aıtty. Munyń jarqyn mysaly – elimizde ótken V Dúnıejúzilik kóshpendiler oıyndary. «AMANAT» partııasy bul baǵytta aýqymdy jumys atqarýda. Partııa jyl saıyn halyqaralyq «Uly dala joryǵy» marafon-báıgesin uıymdastyrýǵa atsalysady. Biz qoǵamdy ulttyq mádenı-tarıhı qundylyqtar tóńireginde toptastyrýǵa umtylamyz. Sonymen qatar Qazaqstanda etnotýrızmdi damytý asa mańyzdy. Partııamyzdyń «Ulttyq mura» jobasy jastardy otanshyldyq rýhta tárbıeleýge, ulttyq sportty, mádenıetimizdi, ónerimiz ben salt-dástúrimizdi dáripteý arqyly qasterli qundylyqtarymyzdy damytýǵa baǵyttalǵan», dedi Dáýlet Káribek.
Bes kúnge sozylǵan marafon nátıjesinde birinshi oryndy Astana qalasynyń komandasy ıelendi. Olar 500 shaqyrym qashyqtyqty 31 saǵat 19 mınýt 5 sekýndta júrip ótip, tózimdiligi men sheberligin dáleldedi. Ekinshi bolyp máre syzyǵyn 32 saǵat 26 mınýt 57 sekýndta Qyrǵyzstannyń (birinshi) komandasy kesip ótti. Al júldeli úshinshi oryndy Ulytaý oblysynyń komandasy ıelendi. Olardyń ýaqyt kórsetkishi – 32 saǵat 37 mınýt 47 sekýnd.
Aıta keteıik, bıyl jarysqa Majarstan, Iran, Qyrǵyzstan, Reseı jáne Ońtústik Afrıka Respýblıkasynan kelgen shabandozdardy qosa alǵanda, barlyǵy 19 komanda qatysty. Alaıda márege tek 5 komanda ǵana jetti. Bul – asa qatal tártip pen jarys jolynyń qanshalyqty qıyn ekeniniń jarqyn dáleli.
Qazaqstan men shet eldiń eń úzdik shabandozdary bas qosqan «Uly dala joryǵy» marafony urpaqtar sabaqtastyǵynyń, qaıtpas qaısar rýhtyń jáne ulttyq qundylyqtarymyzǵa, dara dástúrimizge degen qurmettiń sımvolyna aınaldy. Bul – elimizdiń sporttyq jáne mádenı kúntizbesindegi eń mańyzdy oqıǵalardyń biri.
