Keshtiń shymyldyǵy «Saltanat» memlekettik bı ansambliniń irgetasyn qalaǵan baletmeıster, Qazaqstannyń halyq ártisi Záýirbek Raıbaevtyń «Bıshi qaıyń» bıimen ashyldy.
Sahnany sıqyrǵa bólep, qazaq bıiniń altyn qazynasyna aınalǵan tanymal ulttyq bılermen qatar, orys, uıǵyr, ózbek, tájik, mońǵol halqynyń bıleri túrli aspaptyń súıemeldeýimen kóptiń nazaryna usynyldy. Kásibı sheberliktiń bıik úlgisimen oryndalǵan ár bıden alýan túrli ult pen ulystyń minezi tanylyp, mádenıetiniń kórinisi aıshyqtaldy. Kórermender adamzat tarıhymen birge órilgen bı óneriniń tilsiz qudiretin tereń sezinip, qarapaıym ári kúrdeli qımyl-qozǵalys órneginen izgilik pen dostyqtyń syryn uqty.
Repertýarynda 150-den asa bı qoıylymyn qamtyp, talaı talantty qanat qaqtyrǵan irgeli ujym bıyl 70 jyldyq mereıtoıyn respýblıka aýmaǵynda keń kólemde atap ótedi. Bı óneriniń mádenı mura retindegi tarıhı mańyzyn túsinip, irgetasyn berik qalyptastyrýǵa kúsh salǵan aǵa býynnyń amanatyna keıingi tolqyn jas urpaq adaldyq tanytyp, jańa kezeńge saı sony súrleý salyp, tyń baǵyt-baǵdar taýyp otyrǵanyna osy konsert dálel.
Halyqaralyq bı kúnine oraılas ótken is-sharanyń ekinshi kúni Ulttyq kitaphanada «Saltanat» memlekettik bı ansambliniń fotokórmesi ashyldy. Qazaqtyń qasıetti qazynasyn qımyl qudiretimen halyq nazaryna usynyp júrgen bı óneriniń ardagerleri men maıtalmandary shaqyrylǵan sharaǵa bı ansambliniń 1955 jyldan bastap búgingi kúnge deıingi sahnany qyzyldy-jasyldy shýaqqa shomyldyrǵan 50-den asa tarıhı fotosýreti men baspa betterinde jarııalanǵan maqalalar toptamasy usynyldy. Shara Jıenqulova tabanynyń izi qalǵan óner ordasynyń ár kezeńde jetken jetistikteri jáne alǵys hattarymen kórkemdelgen kórmeni bekzat ónerdiń barlyq janashyrlary tamashalady. Syr shertken sýretter shejiresiniń lentasyn Qazaq KSR eńbek sińirgen ártisi, bı ardageri Nurlybek Áldıbekov, Ulttyq kitaphana dırektory Ǵazıza Qudaıbergenqyzy jáne «Saltanat» memlekettik bı ansambliniń dırektory Elýbaı Kenjalıev qıdy.
ALMATY
