Jańa servıstiń qajettiligi «eGov» qosymshasyndaǵy onlaın saýalnama nátıjesinde aıqyndaldy. Saýalnamaǵa 50 myńnan astam adam qatysyp, olardyń 53%-y jeke derekteriniń ınternette tarap ketkenin baıqasa da, qaıda júginetinin bilmeıtinderin moıyndaǵan. Al 62%-y mundaı jaǵdaıda qalaı áreket etetinin bilse, 31% adam fıshıng degenniń tipti ne ekenin túsinbeıtin bolyp shyqty. Bul – ınternettegi alaıaqtardyń eń kóp qoldanatyn aılasynyń biri. Ár besinshi adam ǵana jalǵan saıtty shynaıy saıttan ajyrata alatynyn aıtqan.
Osy olqylyqty eskere otyryp, «Nomad Guard» dep atalatyn jańa servıs iske qosyldy. Bul qyzmet fıshıngtik siltemelerdi, jalǵan saıttardy jáne derekterdiń taralý faktilerin tekserýge múmkindik beredi.
Atalǵan qyzmetti qalaı qoldanýǵa bolady? Eń áýeli, «eGov Mobile» qosymshasyna kirip, «Basqa servıster» bólimine ótý qajet. Sodan soń «Tekser» batyrmasyn basyp, saıttyń nemese siltemeniń mekenjaıyn engizip, «Jiberý» batyrmasyn basý kerek. Al tekserý nátıjesin «Meniń tekserýlerim» bóliminen kóre alasyz.
Sondaı-aq qosymshada «Alaıaqtyq» bólimi bar, bul arqyly kúmándi jaǵdaılar týraly habarlaýǵa bolady.
