Jınaq úsh bólimnen turady. Birinshisi – «Kóńilimniń báısheshegi», ekinshisi – «Tamyrym – týǵan jerimde», úshinshisi – «Jeruıyǵym – Otanym» dep atalady. Osy úsh bólimge qalam ıesiniń qoǵam men ýaqyt, ult pen rýh, til men dil, dostyq pen mahabbat týraly óleńderi men tolǵaýlary jáne týǵan aýylyn kórkeıtýge ómirin arnaǵan eńbek adamy jaıyndaǵy derekti dastany engen.
Buǵan deıin birneshe jyr jınaǵy shyqqan aqyn óleńderinde basy artyq sóz joq. Uıqasy shymyr. Boıaýdy da kóp jaqpaıdy. Bári de mólshermen. Ony kitaptyń alǵashqy betindegi «Bozqaraǵan» óleńinen-aq baıqaısyz. Buǵan avtor Muqaǵalı Maqataevtyń «Bozqaraǵan» óleńiniń alǵashqy eki shýmaǵyn epıgraf retinde alypty. Biraq Nurlan ony basqasha jyrlaǵan.
«Ádemilik kórmeı kep kópten beri,
Tar qapasta talaı kún ótken edi.
Sezim shirkin, búr jaryp janarymda,
Japyraǵy janymnyń kókteı berdi»,
degen óleń joldarynan aqyn júrginiń lúpili estiledi.
Jınaqtaǵy kólemdi dúnıeniń biri – «Áýletbasy» atty derekti dastan. Buǵan bir áýlettiń tiregi Súleımen Kóshkinulynyń ómir joly arqaý bolǵan. Munda avtor keıipkeri arqyly ótken ǵasyrda halqymyzdyń basynan ótken oqıǵalardy astastyra beınelegen. Dastan jınaqy jazylǵan. Júrdek oqylady.
Qysqasy, aqynnyń jańa jyr jınaǵy óz oqyrmandarynyń júregine jol tabady degen senimdemiz.
Qaısar Qusaıyn
