Bul – kóktem mezgiline arnalǵan, tabıǵatty tiri jáne nurly keńistik retinde qabyldaý ıdeıasyn jalǵastyratyn erekshe týyndylar. Á.Qasteev atyndaǵy Memlekettik óner mýzeıinde jasaqtalǵan ekspozısııaǵa sýretshiniń 2008–2025 jyldar aralyǵynda dúnıege kelgen 21 keskindemesi engizilgen. Olardyń arasynda portretter, peızajdar, gúldi kompozısııalar jáne allegorııalyq týyndylar bar. Kórmedegi árbir jumys – kóktemniń, onyń jaryǵynyń, tynysynyń jeke kúndeligi
ispetti.
Indıra Badambaeva – keskindeme jáne grafıka salasynda tynymsyz eńbektenip kele jatqan kóp qyrly daryn ıesi. Onyń stıli akademııalyq mekteptiń, tabıǵatqa rýhanı kategorııa retinde qyzyǵýshylyqtyń jáne jaryqqa degen umtylystyń toǵysqan tusynda qalyptasqan. Sýretshi peızaj ben natıýrmortqa da, mıfologııalyq beıneler men formanyń ishki qozǵalysy oqylatyn tujyrymdamalyq serııalar jasaýǵa da qyzyǵýshylyq tanytady.
«Máńgilik kóktem» kórmesi – ýaqyttan tys keńistiktiń rámizi retinde baqtyń beınesine arnalǵan kórkem jáne keskindemelik aınalym. Gúlder (gúlsheten, baqbaq, túımedaq, lalagúl) sándik nemese turmystyq elementter retinde emes, jaryq pen tynysy syrtyna tepken tiri jaratylys retinde usynylǵan. Olardyń beınesi janrlyq sheńberlerden tys, bul týyndylardy tynyshtyq pen ishki oıanýdyń tutas aǵyny retinde de qabyldaýǵa bolady. Tústik palıtra jumsaq reńkterden qanyq jasyl jáne ashyq altyn tústes boıaýǵa deıin qubylady. Tústerdi oınata bilý sheberligi fransýz ımpressıonızminiń, eń aldymen, Klod Moneniń áserin kórsetedi. Degenmen, Indıra ótkinshi sáttilikke emes, turaqtylyq pen ishki úndestikke umtylady», – deıdi kórmeniń jetekshisi S.Syrǵabaev.
Sýretshiniń ózi: «Mone Jaratýshyǵa jaqyn», – dep atap ótip, keskindeme arqyly tiri bastaýǵa jaqyndaýǵa bolatynyn óz talpynysy negizinde kórsetedi.
Indıra Badambaeva – birneshe márte respýblıkalyq jáne halyqaralyq jobalarǵa qatysqan, «Gúlder eli» atty art-boıaý kitabynyń jáne «Harper’s Bazaar Kazakhstan» jýrnaly muqabasynyń avtory, sondaı-aq «Kók tý» beınebaıany men «Latyn qarpindegi qazaq álipbıi» jobasy sııaqty birqatar mádenı bastamalardyń teń avtory. Sýretshiniń jumystary Ulybrıtanııa, Ispanııa, Italııa, Germanııa, AQSh jáne basqa da elderdiń jeke kolleksııalarynda saqtaýly.
ALMATY
