Halyqaralyq deńgeıdegi aıtýly dodaǵa Ázirbaıjan, Qyrǵyzstan, О́zbekstan jáne Reseı Federasııasynan, sonyń ishinde Bashqurtstan jáne Tatarstan Respýblıkalarynan sportshy keldi. Sondaı-aq Qazaqstannyń barlyq óńirlerinen, atap aıtqanda Astana, Almaty, Shymkent qalalarynan, Aqmola, Aqtóbe, Almaty, Atyraý, Jambyl, Jetisý, Qaraǵandy, Qyzylorda, Mańǵystaý, Pavlodar, Túrkistan, Batys Qazaqstan oblystarynan jáne Baıqońyr qalasynan da komandalar bar. Týrnırge barlyǵy 1000-ǵa jýyq sportshy qatysyp jatyr.
Halyqaralyq jarystyń saltanatty shylýy rásimine Batys Qazaqstan oblysynyń ákimi Narıman Tóreǵalıev, «Qazaqstan Karate Federasııasynyń Odaǵy» ZTB vıse-prezıdenti Bolat Haýlahat, federasııanyń bas hatshysy Asqar Moldaǵalı, Karate WKF-ten QR memlekettik jattyqtyrýshysy Maııa Baımaǵanbetova, QR jastar quramasynyń bas jattyqtyrýshysy, QR eńbek sińirgen jattyqtyrýshysy, Azııa oıyndarynyń eki dúrkin jeńimpazy, Qajymuqan Muńaıtpasovtyń urpaǵy Shattyq Qajymuqan sekildi tanymal tulǵalar qatysty.
«Bul halyqaralyq týrnır sporttyq mańyzymen qatar, el qorǵaǵan erjúrek batyr qyz — Mánshúk Mámetovany eske alý arqyly jas býynǵa patrıottyq tárbıe berýdi, dostyq pen yntymaqtastyqty nyǵaıtýdy maqsat etedi» deıdi jarysty uıymdastyrýshylar.
Akzhaiyk Open WKF týrnıri «Samuryq-Qazyna» ulttyq ál-aýqat qorynyń qoldaýymen ótip jatyr. Týrnırdiń alǵashqy kúni BQO sportshylary tamasha nátıje kórsetip, 55 kg salmaqta — Álisher Jádigerov, -60 kg salmaqta — Darhan Tımralıev kúmis júlde alsa, +84 kg salmaqta — Taıjan Álisher chempıon atandy.
Týrnır aldaǵy kúnderi jasóspirimder men kadetter arasynda kýmıte jáne kata baǵdarlamalary boıynsha jalǵasady. Jarys 18 mamyrda qorytyndylanady.
Batys Qazaqstan oblysy
