Eýroodaqtaǵy úlken ınvestordyń biri

Keshe Aqordada Memlekettik hatshy Gúlshara Ábdiqalyqova Italııa Respýblıkasynyń Qazaqstandaǵy Tótenshe jáne ókiletti elshisi Stefano Ravanıany qabyldady. Memlekettik hatshy elshini Qa­zaqstanda qyzmetke kirisýimen qut­tyqtaı kelip, eki eldiń ara­syn­daǵy saýda-ekonomıkalyq yntymaqtastyqtyń jyldan-jyl­ǵa artyp kele jatqanyna qanaǵat bildirdi. Bul iske Prezıdent Nur­sultan Nazarbaevtyń 2009 jyly Italııaǵa jasaǵan resmı sapary tyń serpin bergenin aıta kelip, G.Ábdiqalyqova sol saparda Stra­tegııalyq seriktestik týraly mem­leketaralyq kelisimge qol qoıylǵanyn atap ótti. Odan ári Memlekettik hatshy Ita­lııanyń Qazaqstan úshin álem­degi úshinshi orynda turǵan saý­da áriptesi ekendigin jáne eli­miz­diń ekonomıkasyna asa iri kó­lemde ınvestısııa quıýshy eke­nin de eske aldy. Qazaqstannyń Eýro­odaq elderimen aradaǵy taýar aınalymynyń 13 paıyzy Ita­lııa­nyń úlesine tıedi. Al Italııanyń Qazaqstan ekonomıkasyna salǵan ınvestısııasynyń jalpy kólemi 6,5 mlrd. AQSh dollaryn quraıdy, dedi ol. Odan ári G.Ábdiqalyqova Ita­lııanyń Akvıl qalasynda bolǵan joıqyn jer silkinisinen keıin Qazaqstan Italııa halqymen dostyqtyń belgisi retinde osy qaladaǵy «Amıternýmdegi qasıetti Bıadjo» shirkeýin qaıtadan qal­py­na keltirýge 1,7 mln. eýro kóle­minde qarjylyq kómek bergenin aıtty. Kezdesý barysynda ekijaqty áriptestiktiń búgingi jaı-kúıi men yntymaqtastyqty odan ári damy­týdyń bolashaǵy, onyń ishinde ıta­lııalyq kompanııalardyń ındýs­trııalandyrýdyń ekinshi besjyl­dyǵyna, «Nurly Jol – bolashaqqa bastar jol» atty Prezıdent Joldaýynda belgilengen Jańa Ekonomıkalyq Saıasattyń aıasyn­daǵy ınfraqurylymdyq damý josparynyń jobalaryna qatysý múmkindikteri talqylandy. Memlekettik hatshy Qazaqstan óziniń jeke ulttyq pavılonyn usyný arqyly Italııanyń Mılan qalasynda ótetin «EKSPO-2015» halyqaralyq kórmesine belsene qatysýǵa nıetti ekenin jetkizdi. Sondaı-aq, G.Ábdiqalyqova ıta­lııa­lyq áriptesterdiń Astanada bolatyn «EKSPO-2017» kórmesiniń jumysyna belsene qatysatynyna úmit bildirdi. Sonymen qatar, kezdesýde Qa­­zaqstan men Italııa arasyn­daǵy ózge de iskerlik jáne máde­nı-gý­ma­nıtarlyq qarym-qaty­nas­tar­dy nyǵaıtýdyń máseleleri talqy­landy. Jaqsybaı SAMRAT, «Egemen Qazaqstan».