Prezıdent el ekonomıkasynyń damýyna qatysty keńes ótkizdi

ASTANA. 3 tamyz. Memleket basshysy Premer-Mınıstr Kárim Másimovtiń jáne Prezıdent Ákimshiliginiń Basshysy Nurlan Nyǵmatýlınniń qatysýymen keńes ótkizdi. Bul týraly akorda.kz habarlady. Májiliske sondaı-aq, Premer-Mınıstrdiń birinshi orynbasary Baqytjan Saǵyntaev, Prezıdent Ákimshiligi Basshysynyń orynbasary Baǵlan Maılybaev, Prezıdenttiń kómekshisi Nurlan Onjanov jáne Ulttyq ekonomıka mınıstri Erbolat Dosaev qatysty. Is-shara barysynda el ekonomıkasynyń qazirgi ahýaly jáne ony odan ári damytý sharalary, sondaı-aq, Astanada EKSPO-2017 kórmesin uıymdastyrý jáne ótkizý máseleleri talqylandy. Sonymen qatar, aldaǵy mereıtoılyq datalarǵa – Qazaq handyǵynyń 550 jyldyǵyna, Qazaqstan Respýblıkasy Konstıtýsııasynyń 20 jyldyǵyna jáne basqa da halyqaralyq sharalarǵa baılanysty daıyndyq máseleleri qaraldy. Memleket basshysy májiliske qatysýshylardyń nazaryn álemdik ekonomıkadaǵy turaqsyzdyqtyń Qazaqstanǵa tıgizetin teris yqpaldaryna aýdardy. «Naryqtaǵy konıýktýranyń nasharlaýyna, el bıýdjetiniń ahýalyna, sondaı-aq bizdiń negizgi eksporttyq taýarlarymyzǵa degen baǵanyń tómendeýine baılanysty jalpyǵa birdeı qarajat únemdeýdi engizý qajet. Bul sharalardy kelesi jyldyń bıýdjetinde de eskerý kerek. Eshqandaı qıyndyqqa qaramastan, biz ekonomıka ósiminiń qarqynyn tómendetýge jáne azamattarymyzdyń áleýmettik jaǵdaıyn nasharlatýǵa jol bermeýge tıispiz. Halyq aldyndaǵy barlyq áleýmettik mindettemelerdi oryndaý kerek. Biz osy bir kúrdeli kezeńdi eńserýge tıispiz», – dedi Nursultan Nazarbaev. Elaman Qońyr. Derek, sýret: akorda.kz.