Oblystyq Jastar resýrstyq ortalyǵy ókilderiniń aıtýynsha, atalǵan is-shara jumysshy mamandyqtar jylyna oraı ótip otyr.
«Jas túlekter úshin mańyzy zor búgingi is-sharany oblystyq qoǵamdyq damý basqarmasy, jastar resýrstyq ortalyǵynyń uıymdastyrdy. Júzge tarta kásiporyn ókilderi kelip, jastarǵa úsh myńǵa jýyq bos jumys oryndaryn usyndy», deıdi oblystyq Jastar resýrstyq ortalyǵynyń basshysy Abaı Dúısekov.
Resýrstyq ortalyq basshysynyń sózinshe, óńirdegi oqý oryn túlekteriniń shamamen 90 paıyzdan astamy óz mamandyqtary boıynsha jumysqa ornalasady.
«Barlyǵy birdeı osy jármeńkede jumys taýyp ketedi dep aıta almaımyn. Oqý oryndary óz ishinen de jármeńke ótkizip jatady. Túlekter ózderi qalaǵan kásiporynǵa baryp, ornalasady», deıdi A. Dúısekov.
Jumys berýshiler qatarynda «Qazaqtelekom» AQ, «Otbasy bank» AQ, «Qostanaı mıneraldary» AQ, ERG quramyna kiretin «SSKО́B» AQ, «KIA Qazaqstan» AQ, «Allur» AQ, «Baıan Sulý» AQ jáne ekinshi deńgeıli bankter men ózge de kompanııalar bar.
Bos jumys oryndary jármeńkesi barysynda birtalaı jas túlekke jumys berýshiden naqty usynystar tústi. Sonyń biri – Qostanaı polıtehnıkalyq joǵary kolledjiniń túlegi Mansur Madııarov.
«Men óndiristik tehnologııalarǵa burynnan qyzyǵamyn. Mamandyǵym – tehnık-elektromehanık. Osy jármeńke arqyly zaýyt ókilderimen tikeleı sóılesýge múmkindik týdy. Olar maǵan jazǵy taǵylymdamadan ótýdi usyndy. Sátin salsa, turaqty jumysqa alýy múmkin», – deıdi Mansur.
Qostanaı oblysy
