Qalamgerler Atyraýda bas qosty

Memlekettik keńesshi Erlan Qarın «Kóshpeli ple­nýmnyń kóterip otyrǵan máselesi – eńbek adamynyń mártebesin bıiktetý. Qalam ıeleri mańdaı terin tógip, adal eńbek etip júrgen jumys­shylardyń beınesin kórkem shyǵarmalar arqyly jańǵyrtýy qajet. Qalam men eńbektiń tandemi arqyly biz óz dáýi­rimizdiń shynaıy kelbetin jasap, bolashaq urpaqqa ónege bolar asyl qazyna qaldyramyz», dep arnaıy hat joldady.

Munaıly óńirde alǵash ret ótken plenýmda el rýhanııatyna úles qosqan jergilikti qalamgerlerge «Qazaqstannyń qurmetti jazýshysy» ataǵy berildi. Bul ataqqa ıe bolǵandardyń biri – Qa­zaqstannyń Eńbek Eri Ilııa Jaqanov. Tanymal óner qaıratkeri qazaqtyń halyq ánderi men kompozıtorlarynyń shyǵarmashylyǵyn zerttep keledi. Ha­lyq ánderiniń shyǵý tarıhynan birneshe kitap jazdy.

Sondaı-aq «Ádebıet – ardyń isi» qaǵıdatyn baǵdar tutqan atyraýlyq qalamgerler, aqyn Jumeken Náji­me­denovtiń shyǵarmashylyǵyn zert­teýshi, fılologııa ǵylymdarynyń doktory Qadyr Júsip, jergilikti ólketanýshy Tóle­gen Jańabaev, aıtysker Jánıba Qarasaeva atalǵan ataqqa ıe boldy. Qur­metti ataqty Qazaqstan Jazýshylar odaǵynyń basqarma tóraǵasy Mereke Qulkenov tapsyrdy.

Bul plenýmda «Sóz – sybaǵa» ádebı aýksıony ótti. Aýksıonda aldymen qalamgerler men mesenattar tanystyryldy. Mesenattar ózderi tańdaǵan avtorlardyń kitabyn shyǵaryp berýge demeýshilik jasaǵaly otyr. Olardyń arasynda «Qurmet», «Parasat», «Barys» ordenderiniń ıegeri Tóken Jumaǵulov, Qazaqstannyń Eńbek Eri Vladımır Rozmetov, «Qurmet» ordeniniń ıegeri Murat Sarmanov sekildi kásipkerler men Baljigitovter, Qarshegenovter áýletteriniń ókilderi bar.

Máselen, Murat Sarmanov jer­gilikti qalamgerler Tólegen Jańabaev, Qalıolla Izekenov, Jańaı Amantýr­lın, Nazarbek Qosshıev pen Asan­temir Qarshyǵaulynyń kitaptaryn shy­ǵa­rýǵa demeýshilik jasaǵan. Ol endi jer­gilikti aqyn, halyqaralyq «Alash» ádebı syılyǵynyń laýreaty Gúl­zada Nıetqalıevany avtor retinde
tań­dady.

Qalamgerler basqosýynda rýhty jyrymen el jadynda qalǵan daýylpaz aqyn Mahambet atyndaǵy halyqaralyq syılyqtyń jańa ıegerleriniń aty ataldy. Syılyq ıegeriniń biri – aqyn, Memlekettik syılyqtyń laýreaty Iranbek Orazbaev, ekinshisi – ádebıet synshysy, Qazaqstannyń eńbek sińirgen qaıratkeri Álııa Bópejanova. Olardyń árqaısysyna halyqaralyq syılyq­tyń kýáligi men 2 mln teńgeniń sertıfı­katy tabystaldy.

Atyraý oblysy