14 mamyrda Túrkistan qalasynda Saılaý organdarynyń dúnıejúzilik qaýymdastyǵynyń (A-WEB) Bas hatshysy Túrki memleketteri uıymyna (TMU) múshe memleketterdiń Ortalyq saılaý organdarynyń konsýltatıvtik platformasy (OSO KP) týraly erejege qol qoıý rásimine jáne «Túrki álemi: saılaý júıeleriniń dástúri, tájirıbesi jáne damý bolashaǵy» atty halyqaralyq ǵylymı-praktıkalyq konferensııasyna qatysyp, sóz sóıledi.
16 mamyrda Astana qalasynda Ortsaılaýkomnyń keńsesinde A-WEB Bas hatshysy In-shık Chjang Qazaqstan Ortalyq saılaý komıssııasynyń tóraǵasy Nurlan Ábdirovpen kezdesti. Kezdesýge OSK músheleri, komıssııa apparatynyń jáne «QR OSK Injenerlik-tehnıkalyq ortalyǵy» RMK qyzmetkerleri, Astana qalasy men elordalyq aýdandardyń aýmaqtyq saılaý komıssııalarynyń músheleri qatysty.
Kezdesý barysynda taraptar yntymaqtastyqtyń negizgi baǵyttaryn talqylady, saılaý ótkizý, saılaý úderisterinde sıfrlyq tehnologııalardy qoldaný, sondaı-aq saılaýshylardy aqparattandyrý jáne saılaý kezeńinde jalǵan aqparattyń taralý qaýpi máseleleri boıynsha aqparat pen tájirıbe almasty.
Ortalyq saılaý komıssııasynyń tóraǵasy shaqyrtýdy qabyl alǵany úshin In-shık Chjangqa alǵys aıtyp, qaýymdastyqpen jemisti yntymaqtastyqty atap ótti. Sondaı-aq basqa memleketterdiń saılaý organdarymen jáne halyqaralyq uıymdarmen yntymaqtastyqty odan ári keńeıtýge múddeliligi rastaldy.
О́z kezeginde Chjang myrza Qazaqstannyń OSK-sine syndarly yntymaqtastyq pen saılaý salasyndaǵy halyqaralyq áriptestikti damytýǵa qosqan úlesi jáne Qazaqstannyń qaýymdastyq jumysyndaǵy belsendi róli úshin alǵysyn bildirip, elimizdiń saılaýdy ótkizýdegi ashyqtyq pen ınklıýzıvtilik qaǵıdattaryn ustanatynyn basa aıtty. Ol sondaı-aq Qazaqstan Prezıdenti Qasym-Jomart Toqaevtyń jetekshiligimen saılaý júıesin jáne de jalpy eldi damytýdaǵy Qazaqstannyń kúsh-jigerin joǵary baǵalady.
«Qazaqstannyń Ortalyq saılaý komıssııasyn biz úshin túrki álemine qaqpa dep sanaımyz. Tabysty yntymaqtastyq úshin birinshi kezekte tehnologııalarmen almasýymyz kerek. Túrki memleketteri uıymynyń saılaý organdarynyń konsýltatıvtik platformasy bizdiń urpaq úshin ǵana emes, kelesi urpaq úshin de jaqsy tetik bolady dep senemin. Bul platforma Qazaqstanmen, onyń ishinde túrki álemi elderimen yntymaqtastyǵymyzdy júıeleıdi. Sondyqtan biz tyǵyz ózara is-qımyl úshin jaqsy tetik qurǵanymyzǵa óte rızamyz», dedi Caılaý organdarynyń dúnıejúzilik qaýymdastyǵynyń basshysy.
Sonymen qatar Chjang myrza saılaý salasyndaǵy jahandyq trendter, saılaý úderisin sıfrlandyrý týraly aıta kele, bul másele boıynsha qoǵamda konsensýstyń bolmaýyna jáne saılaýshylardyń sıfrlyq saılaý tehnologııalaryna senimsizdigine baılanysty Koreıanyń elektrondy daýys berý júıelerin qoldanbaıtynyna toqtaldy.
Kezdesý ashyq, dostyq jáne kásibı túrde ótti. Kezdesý barysynda taraptar ekijaqty dıalogti, saılaýdy uıymdastyrý, ótkizý máseleleri boıynsha aqparat jáne tájirıbe almasýdy jalǵastyrýǵa nıetti ekenin rastady. Sońynda Nurlan Ábdirov In-shık Chjangqa Qazaqstan Ortalyq saılaý komıssııasynyń 30 jyldyǵyna arnalǵan «Konstıtýsııalyq reforma jáne saılaý júıesi» halyqaralyq konferensııasynyń materıaldar jınaǵyn tabys etti.
