PAVLODAR. 13 aqpan. Pavlodarda «Ermuhan Bekmahanov jáne onyń otandyq tarıhqa qosqan úlesi» atty respýblıkalyq konferensııa ótti. Bul týraly egemen.kz tilshisi habarlady.
Sultanmahmut Toraıǵyrov atyndaǵy Pavlodar memlekettik ýnıversıtetinde ótken konferensııa jumysy Ermuhan Bekmahanovtyń eskertkishine gúl shoqtaryn qoıyp, ǵalym rýhyna taǵzym etýden bastaldy. Sodan soń jınalǵandar «Rýhy máńgilik ǵulama» atty kitap kórmesin tamashalady. Otandyq tarıhtyń negizin salǵandardyń biri Ermuhan Bekmahanovtyń 100 jyldyq mereıtoıy Qazaq handyǵynyń 550 jyldyǵymen qatar kelip tur.
Ermuhan Bekmahanov 1915 jyldyń 14 aqpanynda Baıanaýylda týǵan. Ultynyń shynshyl tarıhyn jazǵany úshin Sibirde aıdaýda boldy.
Konferensııaǵa qurmetti qonaq bolyp kelgen professor Nadııa Bekmahanova ákesiniń eńbekteri men qaıratkerligi týrasynda aıtyp berdi.
Jalpy, ýnıversıtettegi Ermuhan Bekmahanov ortalyǵy osy kúnge deıin 200-den astam ǵylymı týyndylardy jaryqqa shyǵarypty. Plenarlyq otyrys kezinde Sh.Ýálıhanov atyndaǵy Tarıh jáne etnologııa ınstıtýtynyń dırektory, professor, Ulttyq ǵylym akademııasynyń korrespondent múshesi Hankeldi Ábjanov «E.Bekmahanov tulǵasy zamandastary kózimen» atty ǵalym ómiri men shyǵarmashylyǵyna arnalǵan baıandama jasady. Sondaı-aq osy kúni «Ermuhan Bekmahanov jáne tarıhı shyndyq» atty taǵy bir jańa kitaptyń tusaýkeseri boldy.
Jıyn sońynda Ermuhan Bekmahanovtyń 100 jyldyq mereıtoıyna arnalǵan úzdik ǵylymı jumystar baıqaýynyń nátıjeleri boıynsha stýdentter marapattaldy.
Farıda Byqaı.
Derek, sýret: egemen.kz.
