Osy qurylystyń ataýyn árkim árqalaı ataı bastady. Soǵan oraı alýan pikirtalas ta kóbeıdi. Kóbi ınvestorlardyń «Chernyı kanon» degen ataýyna qarsy. Keıbir qazaq «Kórtoǵaı» degen tarıhı ataýdyń orysshaǵa týra aýdarmasynan qashqaqtaıdy. Keıbiri jańadan «Qara shatqal» degen jasandy aýdarma ataýdy usynbaq bolady.
Osy aýdannyń perzenti ári jýrnalıst-ǵalym retinde mynadaı usynysym bar: HH ǵasyrdyń basyna deıin Kórtoǵaıdyń qysań-qypsaǵaılarynda «Báıtiktiń aspakópiri», «Qorjynbaıdyń aspakópiri» degen kópirler bolǵan. Bul kópirler el jaılaýdan qystaýǵa nemese qystaýdan jaılaýǵa kóship bara jatqanda ýaqytsha paıdalanylǵan. Keńes ókimeti kelip jappaı ujymdastyrý jáne baılardy kámpeskeleý naýqanynda ol kópirler de, kópirdi jasaǵandar da tarıh sahnasynan ysyryldy. Ýaqyt óte kele «aspakópir» degen ataýlar umytyldy da, «Kórtoǵaı» ataýy halyq jadynda qaldy.
«Kór» degen sóz biz oılap júrgendeı tek «mola» degen maǵynada qoldanbaǵan. Onyń túrk tilderinde osyǵan mándes «zaǵıp», «soqyr», «qarańǵy» degen de nusqalary bar. Demek biz aıtyp, qoldanyp júrgen «kór» degen sóz «eshteńe kórinbeıtin jer» degen de uǵym bildiredi. Olaı bolsa «Kórtoǵaı» degen toponımdi «mola toǵaı» degen maǵynada emes, «eshteńe kórinbeıtin qarańǵy qalyń toǵaı» degen maǵynada qoldanýymyz jáne ózgelerge de osylaı túsindirýimiz qajet.
Sóıtip, baıyrǵy tarıhı jer ataýyn negizge alyp, «Kórtoǵaı aspakópiri» degen ataýdy jergilikti halyqtyń qalaýy retinde qoldanysqa engizgenimiz jón dep bilemin.
Saǵatbek MEDEÝBEKULY
