Sport • 21 Mamyr, 2025

Jarys kúndeligi

70 ret

kórsetildi

3 mın

oqý úshin

Halyqaralyq fýtbol tarıhy men statıstıkasy federasııasy (IFFHS) osy sport túrin serik etken sańlaqtar arasynan eń úzdikterdi anyqtady. Atalǵan uıym Argentınanyń arlany Lıonel Messıdi teńbil doptyń teńdessiz sheberi dep tanydy. Ekinshi jáne úshinshi oryndardy Pele men Dıego Maradona ıelendi. Sondaı-aq TOP-10-dyqtyń qatarynda Krıshtıaný Ronaldý, Iohan Krýıff, Ronaldo, Zınedın Zıdan, Frans Bekkenbaýer, Alfredo de Stefano, Ronaldıno syndy dúldúlder bar.

Ǵalym SÚLEIMEN

«Dıadıa Vanıa» telegram-arnasy otandyq tennısshilerdiń bıylǵy tabysyn jarııa etti. Eń kóp oljaǵa kenelgen – Elena Rybakına. Bul kúnderi WTA tiziminde 12-orynda turǵan otandasymyz jyl basynan beri 1 200 000 dollar kóleminde paıda tapty. Ekinshi orynda – Iýlııa Pýtınseva. Elimizdiń ekinshi raketkasynyń tabysy – 503 myń dollar. Úzdik úshtikti Aleksandr Shevchenko túıindedi – 459 myń dollar. Odan keıingi satylarǵa Aleksandr Býblık (339 myń dollar), Anna Danılına (120 myń dollar), Mıhaıl Kýkýshkın (104 myń dollar), Dmıtrıı Popko (80 myń dollar), Tımofeı Skatov (48 myń dollar), Denıs Evseev (36 myń dollar), Beıbit Juqaev (32 myń dollar) jaıǵasty.

«Alash Praıd» promoýsheniniń muryndyq bolýymen 27 mamyrda Astanada jalaýy jelbireıtin dúbirli jarysta qazaqtyń áıgili aralas jekpe-jek sheberi, kezindegi «ONE Championship» uıymynyń altyn belbeý ıegeri Qaırat Ahmetov (24-3) jeńil salmaqtaǵy UFC-diń eks-chempıony, amerıkalyq Aldjameın Sterlıngpen kúsh synasady. Qos sańlaq grepplıngtiń erejesi boıynsha aıqasady.

Sporttyq gımnastıkadan Slovenııanyń Koper qalasynda ótken «Challenge Cup» týrnırinde Dıas Toıshybek (14,033 upaı) «at» jattyǵýynda aldyna jan salmaı, altyn tuǵyrǵa kóterildi. Kúmis medaldi qazaqtyń taǵy bir daryndy uly Zeınolla Ydyrysov (13,866 upaı) enshilese, albanııalyq Matveı Petrov (13,200 upaı) qolaǵa qol sozdy.

Qytaıdyń Szıanshan qalasynda aýyr atletıkadan erler men áıelder arasyndaǵy Azııa chempıonaty aıaqtaldy. Jarysta elimizdiń quramasy tym nashar óner kórsetti. 15 ziltemirshiniń tek ekeýi ǵana jeńis tuǵyryna kóterildi. 73 kg salmaq dárejesindegi Pıotr Hrebtov qola medal, 102 kg salmaqtaǵy Artıom Antropov kúmis júlde enshiledi.

Halyqaralyq aýyr atletıka federasııasynyń resmı saıtynda aldaǵy kezde erler men áıelder arasyndaǵy Azııa chempıonattary qaı jerlerde ótetini jarııa etildi. Sonymen 2026 jylǵy sary qurlyqtyń basty dodasyn Úndistannyń Gandınagar qalasy qabyldaıdy. 2027 jylǵy jarys Ońtústik Koreıanyń Chonjý shaharynda uıymdastyrylady.

Fýtboldan Qazaqstan Premer-lıgasynyń toǵyzynshy týry aıaqtaldy. Matchtarda mynadaı nátıjeler tirkeldi: «Oqjetpes» – «Aqtóbe» 1:3, «Atyraý» – «Jetisý» 1:1, «Elimaı» – «Qaırat» – 1:0, «Ulytaý» – «Astana» 0:2, «Jeńis» – «Qyzyljar» 0:0, «Qaısar» – «Turan» – 1:0. «Tobyl» men «Ordabasy» arasyndaǵy kezdesý aýa raıynyń qolaısyzdyǵyna baılanysty keıinge shegerildi. Týrnır kestesinde qorjynynda 25 upaıy bar «Aqtóbe» kósh bastap tur. Ekinshi oryndaǵy «Qaırattyń» olardan eki upaıy kem. Úshinshi satyǵa 21 upaımen «Astana» jaıǵasty.