Qyzylordada jyl basynan beri 2,7 mlrd. teńgeniń jobasy jasaldy

QYZYLORDA. 3 tamyz. Qyzylordada kásipkerlikke qoldaý kórsetý ortalyqtarynyń keńesshileri kásipkerlerge jyl basynan beri jalpy quny 2,7 mıllıard teńgeni quraıtyn 126 bıznes joba ázirlep berdi. Onyń jalpy quny 104 mıllıon teńge bolatyn 10 jobasy qarjylandyryldy. Bul týraly egemen.kz tilshisi habarlady. Kásipkerler palatasynyń keńesshilerine bıznes joba ázirletkenderdiń biri Baýyrjan Tańatar. Ol qyzy Aıdana Bolatbekova ekeýi birinshi «Bıznes-keńesshi», odan keıin «Bıznes ósý» jobasy boıynsha oqyp shyqty. Oqytý kýrsyna ákeli-qyzdy kásipkerler daıyn ıdeıamen keldi: maqsattary jolaýshylar tasymalyn uıymdastyrýǵa baǵyttalǵan kásip ashý. «Bıznes-О́sý» jobasynda Baýyrjan kásibin jan-jaqty zerttep, paıda tabýǵa bolatynyna kóz jetkizdi. Ol búginde bıznesin ashýdyń birinshi kezeńinen sátti ótti, ıaǵnı jolaýshylar tasymaly úshin qajetti qujattaryn ázirlep, tájirıbeli júrgizýshiler aldy. Al Kásipkerler palatasy bıznes jobasyn ázirlep berdi. Qazir kásipkerdiń jobasy qarjylandyrý úshin bankte qaralýda. Aıta ketý kerek, óńirde jyl basynan beri Kásipkerlikti qoldaý ortalyqtarynyń qyzmetin qoldana otyryp 94 azamat kásipkerlik sýbektisi retinde tirkeýden ótip, óz kásibin ashqan. Erjan Baıtiles. Derek: egemen.kz. Sýret: old.palata.kz.