Syr boıynan soltústikke kósh keledi

Halqy tyǵyz qonystanǵan ońtústik kóshi soltústik jurty úshin de sátti bastama bolypty. Osynyń arqasynda Pavlodar óńirinde ǵana 4 mektep jabylýdan aman qalǵan. Jańa qonysqa úıreniskender qazir qaı salada da tabysty jumys istep keledi.

Shyǵysta da halqy azaıǵan biraz eldi mekenniń turǵyndary qataryn osy ońtústik óńirden barǵandar toltyryp otyr. Shyǵys Qazaqstan oblysynyń Eńbek mobıldiligi ortalyǵynyń dırektory Araılym Kerimbekqyzynyń aıtýynsha, elimizdiń ishki kóshi-qonyn júıeli júrgizip, azamattarǵa naqty qoldaý kórsetýdiń nátıjesinde jyl basynan beri Qyzylorda oblysynan 3 otbasy qonys aýdaryp, turaqty jumysqa ornalasypty. О́ńirde bilim berý, densaýlyq saqtaý, aýyl sharýashylyǵy, óndiris, qyzmet kórsetý salalarynda bos jumys oryndary jetkilikti.

Qonys aýdarýshylardy turǵyn úımen qamtamasyz etý, áleýmettik tólemder ta­ǵaıyndaý, balalaryn mektepke nemese balabaqshaǵa ornalastyrý sııaqty jan-jaq­ty qol­daý qarastyrylǵan. Memlekettik qol­daýdan bólek, aýylǵa kóship barǵandar sondaǵy qarııalardyń «qorasy bos turmasyn» degen qamqorlyǵyn da sezi­nedi. Eki sıyr, onshaqty usaq mal berip, onyń jemshóbin, otynyn túsi­rip beretin jomart azamattar da bar.

Byltyr ǵana Rıdder qala­synyń turǵyny atan­ǵan Janar Sydyqova Syr­darııa aýdanyndaǵy Aq­jarma aýy­lynyń týmasy. Q­azir Rıd­der qala­lyq aza­mat­tyq qorǵanys bóliminde ma­mandyǵyna sáıkes qyz­met atqarady. Ol jańa mekenindegi tabıǵattyń sulýlylyǵyna tánti.

Al Kúrshim aýdanyndaǵy Birlik aýylyna Aral qala­synan kóship barǵan Gú­lmıra Tázıeva 7 balasymen «Bir qabatty Shyǵys» baǵ­darlamasy aıasynda bas­panaly bolypty. Úl­ken uly jumysqa ornalasyp, kishileri mektepke qabyl­danǵan Gúlmıra qa­lany aýylǵa aıyrbastaǵanyna esh ókinbeıdi.

Janǵa da, malǵa da jaıly shyǵysta jumysshysyn úımen qamtyp, 1 mln teń­gege deıin jalaqy tóleý­ge daıar qojalyqtar bar. Oblystaǵy jańadan ashyl­ǵan 4 aýdanǵa memlekettik qyz­metkerler, ishki ister sala­synyń mamandary, mu­ǵa­limder men dárigerler jetispeıdi. Jalpy, shyǵystan kelgen delegasııa 1 960 bos jumys ornyn usynyp otyr.

Soltústik Qazaqstan obly­synyń Eńbek mo­bıldiligi ortalyǵynyń basshysy Aman Tóregeldın Qyzyl­orda óńi­rine memlekettiń jumys kúshiniń utqyrlyǵyn arttyrý úshin azamattardyń erikti túrde qonys aýdarýyna yqpal etetin baǵdarlama­ny túsindirý maqsatynda arnaıy kelge­nin aıtady. Oblys – aýyl sharýashy­ly­ǵy men ónerkásip salasy qatar damy­ǵan óńir. Qyzylorda oblysymen ty­ǵyz qarym-qatynasta jumys isteý­diń nátıjesinde bes jylda Syrdan oblysqa 800-ge jýyq adam qonys aýda­rypty.

«Olardyń barlyǵy baspanaly boldy, áleýmettik jaǵynan jaqsy qamtamasyz etilgen. Bul – baǵdar­lamanyń tıimdiligin kórsetetin naq­ty mysaldardyń biri. Biz kóshý­ge nıetti azamattardyń jańa ortaǵa be­ıimdelýine kó­mektesemiz. Bıyl 1 404 bos jumys ornyn usynyp otyrmyz. Onyń ishinde medısına, farmasev­tıka salasynda 98, bilim berý sala­synda 197, aýyl sharýashylyǵynda ­106, energetıka salasynda 76, qury­lys­ta 57, óndiriste 129, biliktilikti qa­jet etpeıtin 95, kólik, logıstıka sala­synda 79 bos jumys orny bar», deıdi Aman Tóregeldın.

Pavlodar oblysynyń Eńbek mo­bıl­diligi orta­ly­ǵynyń dırektory Merýert Esembaevanyń aıtýynsha, bıyl óńir 4 050 adamdy qabyl­daýǵa daıyn. 9 jyl ishin­de bul óńirge syrttan baǵ­darlama aıasynda 20 myńnan astam adam kóship barypty.

Ulytaý, Abaı oblystarynda da jumys kúshi tapshy. Osy óńirlerden kelgen ókilder de «Bolashaqqa baǵdar» bos jumys oryndary jármeńkesinen qajetti maman tabýdan úmitti.

Oblystyq jumyspen qamtýdy úılestirý jáne áleý­mettik baǵdar­la­malar bas­qarmasynyń bólim basshy­sy Nurjan О́mirzaqovtyń aıtýyn­sha, bıyl soltústikke kóshýge 9 653 adam­ǵa óńirlik kvota belgilenipti.

Jalpy, jumys kúshi az aımaqtar­ǵa 2020 jyldan beri 708 otbasy qonys aýdar­ǵan. Bes jyl ishinde sol­tústik óńirlerge qonys aýdarýshylardyń qatary 1,5 ese­ge artqan.

QYZYLORDA