Sýret: gov.kz
Jyl basynan beri 3 203 qazaq tarıhı otanymen tabysyp, qandas mártebesin alypty. Qandastardyń jartysyna jýyǵy, ıaǵnı, 48,1%-y Qytaıdan oralǵan. Sol sekildi 39,5%-y – О́zbekstannan, 5,8%-y – Túrikmenstannan, 2,5%-y – Mońǵolııadan kelgen. Reseıden qonys aýdarǵandardyń úlesi – 1,9%, taǵy 2,2% qazaq basqa elderden kelgen. Mamyrǵa deıingi statıstıka boıynsha eńbekke qabiletti jastaǵy qonys aýdarýshylar sany – 60,7%. Eńbekke qabiletti jastan kishiler, ıaǵnı balalar – 31,1%, zeınetkerler 8,2%-dy quraıdy. Eńbekke qabiletti jastaǵy qandastardyń ishinde joǵary bilimi barlar – 17,9%. Orta kásibı bilimi bar azamattar – 27,8%, 52,9%-y orta bilimdi, 1,4%-nyń bilimi joq.
Qonys aýdarǵandar respýblıkanyń birneshe aımaǵyna turaqtaǵan. Qandastardy qonystandyrýǵa eńbek kúshi tapshy óńirler arnaıy anyqtalǵan. Olar – Aqmola, Abaı, Qostanaı, Pavlodar, Atyraý, Batys Qazaqstan, Shyǵys Qazaqstan, Soltústik Qazaqstan oblystary. Atalǵan óńirlerde bıyl qandastardy qabyldaý kvotasy 2 309 adamdy quraıdy. Búginge deıin osy ólkelerge 642 qandas qonys aýdaryp, kvota alǵan.
Qandastardyń kóshýine sýbsıdııa túrinde memlekettik qoldaý sharalary usynylady. Bir mezgilde otaǵasyna, otbasynyń árbir múshesine 70 AEK (275,2 myń teńge) mólsherinde járdemaqy beriledi. Turǵyn úı jaldaýǵa, kommýnaldyq qyzmetterge bir jylǵa deıin 15-ten 30 AEK (59-den 118 myń teńgege deıin) mólsherinde tólem jasalady. Jalpy, jyl basynan beri 147 qandasqa túrli qoldaý sharalary kórsetilgen. 94 adam turaqty jumysqa ornalasqan.
