Álemdik iskerlik ortanyń nazary aýdy
О́tken jyly elimiz iskerlik formattaǵy 14 halyqaralyq is-sharany qabyldady. Oǵan álemniń túkpir-túkpirinen 3 800-ge jýyq delegat qatysty. Bir qatysýshynyń elimizde jumsaǵan ortasha qarjysy 1 240 dollardy qurady. Bul kórsetkishter elimizdiń jahandyq reıtıngte eki satyǵa kóterilýine, ótkizilgen is-sharalar sany boıynsha 134 eldiń ishinde 78-oryndy ıelenýine múmkindik berdi. ICCA reıtınginde tek turaqty ótetin, keminde 50 qatysýshyny jınaıtyn jáne úsh nemese odan da kóp el arasynda aýysyp uıymdastyrylatyn halyqaralyq qaýymdastyqtardyń is-sharalary esepke alynady. Byltyrǵy álemdik qalalar reıtıngisine elimizdiń eki qalasy kirdi. Almaty 9 iskerlik is-shara ótkizip, 251 pozısııany ıelendi, Astana 5 is-sharamen 367-orynǵa jaıǵasty. Elimizdiń iskerlik týrızmin damytýda «MICE-týrızm elshisi» baǵdarlamasy mańyzdy ról atqarady. 2021 jyldan bastap «Kazakh Tourism» 40 elshini taǵaıyndady. Olar elimizdi iskerlik týrızm ortalyǵy retinde ilgeriletýge jáne mańyzdy halyqaralyq is-sharalardy tartýǵa qolǵabys etedi.
«Kongrestik-iskerlik týrızmdi damytý – bul qysqamerzimdi ekonomıkalyq paıda ǵana emes, sonymen qatar jahandyq dıalog, salalyq yntymaqtastyq jáne turaqty ósý alańy retinde memleketimizdiń uzaqmerzimdi ımıdjine quıylǵan ınvestısııa. «Kazakh Tourism» men elshilerdiń birlesken kúsh-jigeri arqyly elimizde keıingi bes jylda 13 myńǵa jýyq sheteldik delegattyń qatysýymen 51 iri halyqaralyq is-shara sátti ótti. El ekonomıkasyna qosylǵan jalpy úles orta eseppen 17 mln dollardy qurady. Bul sheteldik delegattardyń jalpy shyǵyndarynan qalyptasady jáne ǵımarattardy jalǵa alý jáne qonaqúıde turý ǵana emes, kólik paıdalaný, tamaqtaný jáne basqa da qyzmetterdi satyp alýdy qamtıdy», deıdi «Kazakh Tourism» basshysy Qaırat Sádýaqasov.
Iskerlik is-sharalar kúntizbesindegi kezekti mańyzdy oqıǵa – osy jyldyń 18-22 tamyz aralyǵynda Astanada ótetin IFLA Dúnıejúzilik kitaphana jáne aqparat kongresi. Kitaphana isi salasyndaǵy eń iri bul is-shara álemniń 130-dan asa elinen keletin 4 myńǵa jýyq delegatty biriktiredi. Bul elimizdiń iskerlik týrızm úshin perspektıvalyq alań retindegi halyqaralyq mártebesi artqanyn taǵy bir márte dáleldeıdi.
Jalpy, Memleket basshysy Qasym-Jomart Toqaev túrli jıyndarda sóılegen sózinde týrızm, ımıdj máselesin jıi aıtady. Jýyrda ǵana Qazaqstan halqy Assambleıasynyń HHHIV sessııasynda kók pasportymyz ulttyq biregeıligimizdiń aıqyn nyshanyna aınalyp, jyl ótken saıyn tólqujatymyzdyń abyroı-bedeli kóterilip kele jatqanyn jetkizdi.
Ortalyq Azııaǵa biryńǵaı týrıstik keńistik ne úshin qajet?
Jaqynda elimiz álemdik týrıstik kartadaǵy Ortalyq Azııanyń ornyn kúsheıtip, óńirlik týrızmdi ilgeriletý boıynsha memleketaralyq keńse qurýdy usyndy. Bul básekege qabilettilikti arttyryp, aýqymdy transshekaralyq týrıstik ónimder qalyptastyrýǵa jáne týrıster aǵynyn ulǵaıtýǵa jol ashady. «Kazakh Tourism» ulttyq kompanııasy tıimdi memleketaralyq áriptestiktiń qajetti qadamdary jaıly qujat daıyndady. Onda resýrstardy biriktirýmen qatar, ortaq týrıstik keńistik qurý usynylǵan. Bul saıahatshylarǵa bir saparda birneshe eldiń mádenıetin, tarıhyn jáne tabıǵatyn tanýǵa múmkindik beredi.
«Biz básekelese otyryp, yntymaqtasýymyz kerek. Alys shetelden keletin árbir ekinshi týrıst, kem degende, bir saparda eki memleketti kórgisi keledi. Ortalyq Azııa óńirine baǵyttalǵan eń tanymal týrlar «FiveStans» dep atalady. Bul marshrýt bizdiń negizgi týrıstik ónimimizge aınalýy kerek», dedi «Kazakh Tourism» UK» AQ basqarma tóraǵasynyń orynbasary Danıel Serjanuly.
Ortalyq Azııadaǵy biryńǵaı týrıstik keńistik aıasynda birlesken baǵyttar qurý, kólik baılanystaryn damytý, qyzmet kórsetý sapasynyń ortaq standarttaryn ázirleý, sheteldik qonaqtarǵa vızalyq jáne shekaralyq rásimderdi jeńildetý múmkindikteri usynylyp otyr. О́ńir elderiniń aýmaǵynan ótetin Uly Jibek joly boıymen týrıstik baǵytty qaıta jandandyrý kóshbasshy jobalardyń birine aınalýy múmkin. О́tken jyly osy baǵytta alǵashqy qadamdar jasaldy. Qazaqstan men О́zbekstan arasyndaǵy «Jibek joly» halyqaralyq temirjol týry – yntymaqtastyqtyń bir úlgisi. Transshekaralyq baǵyt tek óńir elderinen emes, shet elderden de saıahatshylardyń nazaryn aýdardy. Soltústik Eýropadaǵy «Visit Scandinavia», Latyn Amerıkasyndaǵy «Mundo Maya», Balqan túbegindegi «Via Dinarica» tárizdi basqa óńirlik bastamalar týrıster úshin ákimshilik shekaralar emes, áser men tájirıbe mańyzdy ekenin dáleldeıdi.
Bizde týrızm klasterin jan-jaqty damytýdyń resýrstary barshylyq. Biraq bul sala keremet jolǵa tústi dep aıtýǵa áli erte. Degenmen týrızmdi damytýǵa memlekettik deńgeıde mán berilip, elimizdi jaıly ári ómir súrýge qaýipsiz aýmaqqa aınaldyrý basty nazarǵa alynǵan.
