Elbasy Mádenıet jáne sport mınıstrin qabyldady

ASTANA. 3 tamyz. Elbasy Mádenıet jáne sport mınıstri Arystanbek Muhamedıulyn qabyldady. Bul týraly akorda.kz habarlady. Kezdesý barysynda Qazaq handyǵynyń 550 jyldyǵyn merekeleýge daıyndyq máseleleri, sondaı-aq, «100 naqty qadam» ulttyq is-qımyl josparyn júzege asyrý aıasyndaǵy mınıstrliktiń qyzmeti talqylandy. Memleket basshysy merekelik sharalardy daıarlaý barysynda negizgi salmaq Mádenıet jáne sport mınıstrligine túsetinin aıtty. «Osy jyldar ishinde Memleket tarıhy ınstıtýty quryldy, kóptegen ǵalymdarymyz tarıhı materıaldar izdep tabý jáne olardy jan-jaqty zerdeleý úshin shetelderge shyqty. El bolý úshin, sondaı-aq, jastardy patrıottyq turǵyda tárbıeleý úshin bizge Qazaqstannyń shynaıy tarıhy kerek», – dep atap ótti Nursultan Nazarbaev. Qazaqstan Prezıdenti mereıtoıdy qalyptasqan kúrdeli ekonomıkalyq jaǵdaıda artyq shyǵynsyz, biraq halyq jadynda qalatyndaı sapaly ótkizý kerektigin aıtty. Memleket basshysy mereıtoılyq sharanyń basty maqsaty barsha qazaqstandyqtardyń patrıotızmin nyǵaıtý jáne olardyń rýhanı turǵydan ósip-jetilýin qamtamasyz etý bolyp sanalatynyn atap ótti. Mádenıet jáne sport mınıstri merekelik sharalar Astanada jáne Tarazda ótetinin aıtty. «Qazaq handyǵynyń 550 jyldyǵyn merekeleý qazaq halqynyń birtektiligi men birligin nyǵaıtý úshin óte mańyzdy. Biz birinshi kezekte halyqaralyq ǵylymı-tájirıbelik konferensııalar ótkizýge kóńil bólemiz. Sonymen qatar, qazirgi kezde Tarazda etnografııalyq mýzeı jáne ortalyq salynýda. Mańyzdy arheologııalyq jumystar júrgizilýde», – dedi Arystanbek Muhamedıuly. Memleket basshysy kezdesý qorytyndysy boıynsha birqatar naqty tapsyrma berdi. Elaman Qońyr. Derek, sýret: akorda.kz.