Olımpıadaǵa tirkelý osy jyldyń 13 qańtarynda bastalyp, irikteý kezeńi 8 aqpan kúni onlaın formatta ótti. Respýblıkanyń barlyq óńirinen 9-11-synyp boıynsha 5 myńǵa jýyq oqýshy qatysty. Al olımpıadaǵa 64 komandadan quralǵan 192 oqýshy joldama alyp, Astana qalasyna keldi.
Uıymdastyrýshylardyń aıtýynsha qatysýshylar «Pikirsaıys» týrynda oı bólisý, dálel keltirý jáne qarsy pikirge jaýap berý arqyly pikirsaıys mádenıetin damytyp, «Tilshiler» kezeńinde esse, mazmundama jáne taldaý jazý arqyly jazý mádenıeti men oıdy erkin jetkizý qabiletin kórsetti. Al «Bilimpazdar» baǵytynda ǵylym men bilim taqyrybyndaǵy 40 suraqtan turatyn onlaın-vıktorınada qatysýshylardyń jyldamdyǵy men alǵyrlyǵy synaldy.
Olımpıadanyń bas júldesin Túrkistan oblysynan kelgen «Dostyq» komandasy jeńip aldy. Sonymen qatar 11-synyptyń 8 úzdik oqýshysyna elimizdiń jetekshi joǵary oqý oryndary - Abaı atyndaǵy Qazaq ulttyq pedagogıkalyq ýnıversıteti (5 grant) jáne Narxoz ýnıversıteti (3 grant), Coventry University (1 grant) bilim granttaryn tabystaldy.
Budan bólek, 5 komanda - «Úzdikter», 10 komanda - «Ozattar», 16 komanda - «Myqtylar», 32 komanda - «Belsendiler» atalymy boıynsha marapattaldy.
Qazylar alqasynyń quramyna fılolog-ǵalymdar, «Bilim-Innovasııa» lıseıleriniń mamandary, ádiskerler, sondaı-aq tanymal tilshi-jazýshylar endi.
«Bul olımpıada - bilimdi qazaq tilinde alyp jatqan balalardyń arasynda, qazaq tili men ádebıet pánine erekshe yqylasy aýǵan, bolashaq tilshiler, tarıhshylar, jalpy elimizdiń rýhanııatyna, mádenıetine eńbek etetin, boıynda qabileti bar balalardy iriktep, solarǵa jol ashýǵa jasalǵan úlken joba. Qazaq tilin meńgerý deńgeıin kóterý baǵytyndaǵy jumysymyz tıisti satyǵa jetpeı, basqa saladaǵy til tóńiregindegi amaldarymyz kóp nátıje berýi ekitalaı. Sondyqtan osy baǵyttaǵy júzege asyp jatqan is-sharalardyń biri - elimizdiń barlyq aımaqtaryn qamtyǵan «Ana tili» olımpıadasy», dedi Halyqaralyq «Qazaq tili» qoǵamynyń prezıdenti Raýan Kenjehanuly.
«Ana tili» olımpıadasynyń basty maqsaty - qazaq tilin jastar arasynda keńinen nasıhattaý, ony ǵylym men bilim tiline baǵyttaý, sondaı-aq oqýshylardyń oqý saýattylyǵy men jazý mádenıetin arttyrý.
«Osy baǵytta Halyqaralyq «Qazaq tili» qoǵamy muǵalimderge turaqty túrde ádistemelik qoldaý kórsetip, til janashyrlarynyń forýmdaryn uıymdastyryp keledi. «Ana tili» olımpıadasy qazaq tilin jetik meńgerýge yntalandyrý arqyly ony jastar arasynda brendke aınaldyrýdy kózdeıdi. Joba aldaǵy jyldary da dástúrli túrde jalǵasyn tabady», dedi Raýan Kenjehanuly.
