Sýret: vecher.kz
Qara shańyraqta otyrǵan kelinge qolqa salǵanbyz. О́tinishimizdiń oraıy – bıe saýý. Baıaǵyda bala kezimizde aýyldaǵy ár úıdiń bosaǵasynda hosh ıisi ańqyǵan kúbi turýshy edi. Qazir neken-saıaq.
– Úsh bıe qulyndady, – dedi inishek, – bárin saýsaq ózimizge de, senderge de jetedi. Tek qor taba almaı otyrmyz.
Iá, qor kerek-aq. Buryn bolǵan. Qazir ilkidegi úrdis úzilgen. Aq ájemniń áleýetti sharýasy oıǵa oralǵany. Ájem áldebir ándi yńyldap júrip, jańa saýylǵan bıeniń sútin kir shalmaǵan tap-taza súzgiden ótkizip, jyp-jyly kezinde kúbidegi qordyń ústinen quıatyn. Sodan soń mindetti túrde otyz- qyryq mınýt pisip, aýzyn búrkemelep, qymtap qoıatyn. Úıdegi balalar kúbini árqaısymyz sanap pisip, men júzge, men eki júzge jetkizdim dep bir-birimizge maqtanatynbyz. Alǵash ret qymyz ashytarda bıeniń súti arnaıy ashytqynyń nemese qordyń ústine quıylatyn. Ashytqyny ádette súr jaıanyń, qazynyń synyq-súıemin salyp sútten, ol bolmasa sútke nan ashytqysyn ezip ázirleıtin. Qor degenimizdiń ózi – eski, burynǵy qymyz. Qazaqta kóne zamannan buryn kele jatqan «qory úzilmegen» degen astaryna kóp maǵyna sııatyn sóz tirkesi bar. Bul arada jalǵyz qymyzdyń qory aıtylmasa kerek, ondaǵy aıtpaq oıdyń ushyǵy qorly, qordaly shańyraq óziniń árbir isine uqypty, tyńǵylyqty otbasy degen uǵymdy bildirse kerek-ti. Qordyń úzilmeýi kúndelikti tirshilikte bir-birine sabaqtasyp jatatyn qat-qabat sharýanyń ret-retimen atqarylýyna qajetti turmystyq jaılardyń ózara jarasym tabýy. Sary qymyz qashan da adam aǵzasyndaǵy san alýan dertke shıpa, denege kúsh quıatyn qasterli, qudiretti taǵam bolyp sanalady. Qymyzdyń erekshe dámdi, aıryqsha qunarly, jan saraıyńdy ashyp, sińimdi keletindigi. Jylqy – jaratylysynan óte kirpııaz túlik. Ol myń san shóp ósetin jaıylymnan tek asylyn ǵana terip jeıdi, sýdy jaldap júrip tunyǵyn ǵana ishedi. Osynyń bári aınalyp kelgende bıe sútiniń qunaryn ózge tórt túlik maldyń sútinen áldeqaıda artyǵyraq etip turady.
О́tkenniń eski elesi kóńil tebirentti. Qaıran aýyldyń qory úzilmesinshi. Qymyzdyń ǵana emes, qyrýar qazaqy sharýanyń dep tiledik.
