Sýretti túsirgen – Erlan OMAR, «EQ»
Ulytaý ulttyq tarıhı-mádenı jáne tabıǵı mýzeı-qoryǵyna qoıylǵan árbir jádiger, árbir qujat – tarıhtyń tiri kýásindeı. Mýzeı qabyrǵasyndaǵy únsiz jádigerler babalar daýysy bolyp estiledi: birinde kóne dáýir tynysy, birinde joryq kórgen jaýyngerdiń júzi, endi birinde Han keńesiniń úni bar.
Ulytaý mýzeıine aıaq basqan sátten-aq mekemedegi jumystyń júıeli, mazmundy ekeni birden baıqaldy. Mýzeıdiń kórneki qurylymy, ekspozısııalardyń reti, taqyryptyq mazmuny – barlyǵy da kásibı sheberlik pen jaýapkershiliktiń nátıjesi. Mýzeı-qoryǵynyń basshysy Álibek Kúzerbaev murajaıdyń zamanaýı formatta damyp, jas urpaqqa qyzyqty ári tartymdy dúnıelerdi usynýǵa baǵyt alyp otyrǵanyn atap ótti. Mýzeıdiń ǵylymı qyzmetkerleri men ekskýrsııa jetekshileri Azat Sabyrjan men Aıbolat Rahmanııa árbir jádiger týraly tarıhı derek aıtyp qana qoımaı, tyńdaýshyny sol dáýirge jeteleıtindeı ásermen áńgimeleıdi.
Ulytaýdyń kıeli oryndary – ejelgi qazaq dalasynyń rýhyn boıyna sińirgen Joshy han kesenesi, Alasha han mazary, Edige batyrdyń eskertkishi, Dombaýyl men Ketbuǵa babaǵa qatysty ańyzǵa toly áńgime tarıhı sanany silkintpeı qoımaıdy. Ár tóbe men jota, ár tas pen ózen – el shejiresiniń bir taraýy.
Jalpy, kez kelgen mýzeı ujymyn naǵyz rýhanı maıdannyń sarbazdary deýge bolady. Olardyń eńbegi kózge kórinbese de úlken mánge ıe. Mádenı muraǵa degen uqypty kózqaras, jas urpaqtyń tarıhı sanasyn oıatý jolyndaǵy qajyrly eńbekteri – ult tarıhy úshin asa qundy qyzmet.
Janat BISENBAEVA,
Phd, qaýymdastyrylǵan professor
