Jánibektiń jetistigi

Informatıka pánine burynnan qyzy­ǵatyn Jánibek 10-synyptan beıindi pán­derin tańdap, daıyndyǵyn bastaǵan. Sabaqta belsendi bolyp, qosymsha kýrstarǵa qatysty. UBT-ǵa kirer aldynda azdap qobal­jyǵan Jánibek óz bilimine sengen. Test suraqtary negizinen bu­rynnan daıyndalǵan taqyryptardan kelip­ti. «Armanym – IT salasynyń mamany bolý. Baǵdarlamalar qurastyrý, jańa júıe­lerdi meńgerý maǵan qyzyq. Osy baǵyt­ty tereńdetip oqyǵym keledi. Sol sebep­ti UBT-da beıindik pán retinde ınformatıkany tańdadym. Qaı ýnıversıtetke túsetinimdi naqty sheshken joqpyn, biraq Almaty qalasynda bilim alsam degen oıym bar. Maǵan bilim men tárbıe, baǵyt-baǵdar bergen ustazdaryma alǵysym sheksiz», deıdi Jánibek.

Kópbalaly otbasynan shyqqan Jánibek­tiń ákesi vahtada jumys isteıdi, anasy úı sharýasynda. О́zinen úlken aǵasy qyzmette bolsa, keıingi úsh inisiniń de sabaq úlgerimi jaqsy eken. Synyp jetekshisi Gúlzıra Aǵabekqyzy shákirtiniń joǵary nátıje kórsetetinine senimdi bolǵanyn aıtady. «Oqýshym sabyrly, bilimge qushtar ári jaýapkershiligi joǵary. Minezi – tu­ıyq, emosııasyn syrtqa shyǵarmaıdy. Su­raq qoı­sań tııanaqty jaýap beredi. Sa­baq úl­gerimi jaqsy boldy», deıdi synyp jetek­shisi. Al Jánibektiń anasy Gýlıa Boran­­baeva balasynyń kúndiz-túni daıyn­dal­­ǵanyn, arnaıy onlaın kýrs satyp alǵa­nyn aıtady. «Bolam degen balanyń betin qaqpa, «belin bý» degen. Biz de barynsha kómektestik. Sabaq­pen áýre bala ǵoı. Tynymsyz daıyndaldy. Úı tirligine moıyn burǵan joq. О́z eńbeginiń, tabandylyǵynyń, muǵalimderiniń qoldaýymen osy jetistikke jetti», deıdi Jánibektiń anasy.

Shoqan Ýálıhanov atyndaǵy mektep-gımnazııa dırektory Sáýle Egemberdiqyzy Jánibektiń jetistigi ózge oqýshylarǵa úlgi bolyp, yntalandyra túskenin aıtady. Bıyl mektep bitiretin 101 oqýshynyń barlyǵy UBT tapsyrýǵa nıet bildirgen. El kóleminde alǵash bolyp eń joǵary upaı jınaǵan Jánibek Ábilhanǵa búginde syı-qurmet kórsetilip jatyr. Mysaly, oblys ákiminiń orynbasary Beısenbaı Tájibaev arnaıy qabyldap, bilim jolynda talmaı talaptanyp, tabystan-tabysqa jete berýine tilektestigin bildire otyra, úzdik shákirtke jáne ustazy men anasyna arnaıy alǵyshat pen syı-sııapat tapsyrdy. Aýdan ákimi Azat Oralbaev ta úzdik oqýshyny marapattady. Al Jánibek keıingi bir jyl boıy daıyndalǵan qosymsha bilim berý ortalyǵynyń basshylyǵy páterdiń sertıfıkatyn tabys etken.

Aıta ketelik, bıyl Túrkistan oblysynda 34 myńǵa jýyq oqýshy 11-synypty bitiredi. Olardyń 27 myńnan astamy UBT tapsyrýǵa nıet bildirgen.  Mektep bitirý­shilerdiń ishinde 2 313 oqýshy «Altyn bel­gige», al 2 400-i «Úzdik attestatqa» úmitker.

Túrkistan oblysy