Densaýlyq saqtaý mınıstri Aqmaral Álnazarova, Dúnıejúzilik densaýlyq saqtaý uıymynyń Qazaqstandaǵy keńsesiniń basshysy Skender Syla, Dúnıejúzilik densaýlyq saqtaý uıymy Eýropalyq aımaqtyq bıýrosynyń, Germanııa, Reseı, Túrkııa, Fınlıandııa Latvııa, О́zbekstan, Qyrǵyzstan, memleketteri mamandary qatysqan jıynda táýelsiz meıirgerlik qyzmetti damytý, orta medısınalyq qyzmetkerlerdiń densaýlyq saqtaý júıesindegi rólin arttyrý jaıly keńinen aıtyldy.
Konferensııada oblys ákimi Nurlybek Nálibaev óńir medısınasyndaǵy jańalyqtarǵa toqtaldy. Aımaqtaǵy medısına mekemelerinde 12 myńǵa jýyq meıirger eńbek etedi. Olardyń halyq densaýlyǵyn jaqsartýǵa qosqan úlesi ólsheýsiz.
«О́tken jyly aımaqtyń densaýlyq saqtaý salasynyń bıýdjeti 146 mlrd 200 mln teńgege jetip, «Aýylda densaýlyq saqtaýdy jańǵyrtý» ulttyq jobasy aıasynda barlyq aýdanda 28 medısınalyq nysan salyndy. Qyzylorda qalasynan jylyna 10 myń adamǵa deıin qyzmet kórsetýge múmkindigi bar jańa Qan ortalyǵy ashylyp, el ıgiligine qyzmet ete bastady. Ana men bala ómirin qorǵaýda kópbeıindi oblystyq aýrýhana bazasynda jańa MRT apparaty iske qosylyp, 70 oryndyq perınataldyq bólim paıdalanýǵa berildi. Oblys ortalyǵynda emhanasy men onkologııalyq bólimshesi bar 300 oryndyq kópbeıindi aýrýhana, ulttyq joba aıasynda 4 kópbeıindi aýdandyq ortalyq aýrýhana janynan qosymsha qurylys salynyp jatyr. Medısına salasyn bilikti kadrlarmen qamtamasyz etý maqsatynda byltyr jergilikti bıýdjet qarajaty esebinen mamandar biliktiligin arttyrýǵa 144 mln teńge bólindi», dedi oblys basshysy.
Konferensııada meıirgerlik qyzmetti damytý baǵytynda usynystar aıtylyp, medısınalyq kolledj ctýdentterine sheteldik oqý oryndaryna joldamalar tabystaldy. Ǵasyrǵa jýyq tarıhy bar Qyzylorda medısınalyq joǵary kolledjinde búginde 2 840 stýdent bilim alyp jatyr, 142 oqytýshy eńbek etedi. Túrkııanyń «Acibadem», «Liv Hospital», «Medicana Atasehir», «Medical Park» klınıkalar jelisimen memorandýmǵa otyrǵan kolledjdi «Emdeý isi», «Meıirger isi» mamandyǵy boıynsha bitiretin 30 jas soltústik oblystarda, «Farmasııa» mamandyǵyn alǵan 6 stýdent Almaty qalasyndaǵy «Botanıkalyq baqta» tájirıbeden ótken. Rıga medısınalyq kolledjinde 3 stýdent oqýyn jalǵastyryp keledi.
Jumys istep júrgen orta býyn mamandarynyń bilimin jetildirip, ortalyqtandyrylǵan trenıng júıesin qalyptastyrý maqsatynda byltyr kolledj janynan «Meıirger isin damytý» ortalyǵy ashyldy. Ortalyq arqyly júrgizilgen monıtorıng nátıjesinde mektep meıirgerleriniń 1,9%-y ǵana bilimin jetildirý kýrsynan ótkeni belgili boldy. Sol sebepti «Mektep medısınasyndaǵy meıirger isi» taqyrybynda 300 saǵattyq sertıfıkattaý kýrsy uıymdastyrylyp, bilim oshaqtaryndaǵy 417 meıirgerdiń 97%-y kýrstan ótken. Kolledjde Latvııa tájirıbesi negizinde pasıenttiń týysyn naýqas kútimine oqytýǵa arnalǵan «Meıirgerlik kútim» arnaıy kabıneti ashyldy. Onda tósek tartyp jatqan jannyń jaqyndaryna qajet daǵdylardy úıretedi.
Byltyr jergilikti bıýdjet qarajaty esebinen medısınalyq uıymdardyń 30 dárigeri hırýrgııa, endoskopııa, nevrologııa, kardıohırýrgııa, neanataldy hırýrgııa, balalar ortopedııasy boıynsha Túrkııa, Reseı, Belarýs Respýblıkalarynyń jetekshi klınıkalyq-akademııalyq bazalarynda bilimderin jetildirdi. О́ńirge asa qajetti medısına mamandyqtary boıynsha 176 rezıdent oblys ákiminiń grantymen bilim alyp keldi. «Jalpy tájirıbeli dáriger» mamandyǵy boıynsha maman daıarlaýǵa oblys ákiminiń 177 bilim berý granty bólindi.
«О́tken jyly mádenıet salasynyń qyzmetkerlerine alǵash ret kópqabatty turǵyn úı salynyp, 40 jańa qyzmettik páter tabystaldy. Búgingi halyqaralyq mańyzdy sharada densaýlyq saqtaý salasynyń qyzmetkerlerine de 100 páterlik jańa turǵyn úı salý jóninde sheshim qabyldadyq. Jaqyn arada qurylysy bastalyp, jyl sońyna deıin tabystalady», dedi oblys ákimi.
Sońǵy eki jylda oblystyń barlyq eldi mekenindegi densaýlyq saqtaý mekemelerine 225 jańa sanıtarlyq avtokólik tabystalǵan. Halyq suranysyna sáıkes 45 jedel járdem kóligi alynyp, oblystyq medısınalyq jedel járdem stansasy tolyq qamtamasyz etildi.
QYZYLORDA
