Foto: Aqorda
Ulttyq qaýipsizdik komıtetiniń tóraǵasy Ermek Saǵymbaevtyń aıtýynsha, UQK materıaldary negizinde 43 adam lańkestik pen dinı ekstremızm baby boıynsha sottalǵan jáne 34 azamat tergelip jatyr. Terrorızm men ekstremızmge qatysy bar 212 sheteldiktiń Qazaqstanǵa kirýine jol berilmedi. Radıkaldy uıymdarǵa múshe 1498 sheteldik adamnyń elimizge kelýine shekteý qoıyldy. Terrorıstik jáne ekstremıstik qylmystar jasaǵany úshin izdeýde júrgen 12 sheteldik azamat ustaldy.
Qasym-Jomart Toqaevqa Terrorızmge qarsy ortalyqtyń kezekti otyrysy ótkizilgeni jóninde málimet berildi. Ekstremızm men terrorızmge qarsy is-qımyldyń memlekettik júıesin damytýǵa arnalǵan keshendi jospardy júzege asyrý barysy qaraldy. Qazaqstan arqyly lańkesterdi alyp ótý, lańkestik áreketke qajetti qarjyny aýdarý faktilerin eskere otyryp, terrorızm qaýpin tómendetý boıynsha qosymsha sharalar ázirlendi.
Memleket basshysyna Ishki ister mınıstrligimen birlesip 13 qylmystyq toptyń qyzmeti toqtatylǵany, olardyń 142 múshesi ustalǵany jáne 40 azamattyń tutqyndalǵany týraly baıandaldy. Zańsyz aınalymda júrgen 282 atys qarýy, 48 granata men 4586 oq-dári tárkilengen.
Esirtki óndiretin 12 zerthana, sondaı-aq 13 halyqaralyq jáne 12 óńirlik tasymal arnasy joıylǵan. Zańsyz aınalymnan 3,2 tonna esirtki men psıhotropty zattar, 7,5 tonna prekýrsorlar alyndy.
Sybaılas jemqorlyq pen quqyqqa qaıshy basqa da áreket jasaǵan memlekettik jáne quqyq qorǵaý organdarynda jumys isteıtin 15 laýazymdy tulǵa quryqtaldy. Ekonomıkalyq qaýipsizdikti qamtamasyz etý aıasynda 1,6 trıllıonnan asa teńge kóleminde memleketke keltiriletin zalalǵa tosqaýyl qoıylyp, onyń 220 mıllıard teńgesi qazynaǵa qaıtaryldy.
Memlekettik shekarany buzǵan 16 myńnan astam adam ustaldy. 3025 tulǵa elden shyǵaryldy. Qarý-jaraq pen oq-dári, esirtki jáne basqa da tyıym salynǵan zattardy alyp ótpek bolǵan 600-den asa fakti áshkerelendi. Shekara arqyly 11 mıllıard teńge men quny 16,6 mıllıard teńge bolatyn taýarlardy zańsyz alyp ótýge jol berilmedi.
Sonymen qatar memlekettik organdardyń aqparattyq júıesine jasalǵan 796 mıllıon kıbershabýyl áshkerelengen.
Kezdesý sońynda Prezıdent ulttyq qaýipsizdik organdary qyzmetiniń baǵyttary boıynsha birqatar tapsyrma berdi.
