«Silense» bı teatrynyń negizi 2004 jyly qalanǵan. Ujym 2023 jyly jańa formatta jandandy. Sol kezden bastap talapty qyzdardy Mádenıet salasynyń úzdigi, horeograf Botagóz Turlybekova daıyndap júr.
«Bul bı teatrynda tek qulaǵy nashar estıtin jandar bıleıdi. Alǵashynda bul topqa konkýrstar úshin ǵana bı qoıyp júrdim. Sol baıqaýlardan ylǵı da júldeli oryndarmen oraldy. Qyzdarmen jaqyn tanysa kele ishki jan dúnıesin túsinip, bıge degen qushtarlyqtarynyń bıik ekenin baıqadym. Jetekshilik etý mindetin moınyma alyp, top aldyna mańyzdy mejelerdi bekitip, etene iske kirisip kettik», deıdi Botagóz Serikqyzy. Ol erekshe qyzdarmen túsinisý úshin maqsatty túrde ym-ıshara tilin de meńgergen.
«Ádette bı úıretkende obraz arqyly, tilmen sýrettep jetkizemiz. Olarǵa ony aıta almaıtyn bolǵandyqtan ym-ıshara tilin qoldaný kerek. Balalardyń janyn tereń túsiný úshin osy tildi arnaıy kýrsqa baryp úırenip shyqtym. Asylynda, bıdi qımyl men ıshara quraıdy. Sondyqtan asa kedergi joq. Keıde meniń qatelesken tusymdy qyzdar tolyqtyryp, tilsiz-aq túsinisip kelemiz», deıdi horeograf maman.
Qyzdar aptasyna úsh ret sheberligin shyńdaıdy. Talmaı eńbek ete júrip qorjyndaryn 9 bı qoıylymmen tolyqtyrǵan. Onyń tórteýi ym-ısharaǵa negizdelgen.
Olardyń ózara uıymshyldyǵy men bir-birin qoldaýy da árdaıym jeńis tuǵyrynan tabylýǵa septesip júr. Bı ujymy Oral qalasynda ótken «Sizdi bıge shaqyramyz» atty respýblıkalyq bı baıqaý-festıvalinde Ulttyq bı atalymy boıynsha Gran-prı, zamanaýı bı atalymy boıynsha III oryndy ıelengen. Sondaı-aq Astanada uıymdastyrylǵan «Mega-Star» shyǵarmashylyq baıqaýynda «Bas júldeni» jeńip alyp, Germanııa, Egıpet sahnalarynda óner kórsetýge joldama alǵan. Shekteýli múmkindik shekarasyn kesip ótken «Silense» bı teatry saý balalar arasynda da top jaryp júr.
Erekshe jandardy bıge baýlý «bı-qımyl terapııasy» dep atalady. Munda bı arqyly jandy emdeıdi. «Silense» bı teatrynyń múshesi Arýjan Asqarova ustazdary bul mindetti únsiz uǵynyp júrgenin jetkizdi.
«Ustazymyz óte meıirimdi adam. Bizdi qıyndyqta qaldyrǵan emes. Árdaıym shabyttandyryp, alǵa umtyldyrady. Osyndaı qarym-qatynasyna qarymta retinde qyzdar da qarap qalmaı baryn salady», dedi ol.
