Eskeretin dúnıe – bıyl dana Abaıdyń dúnıege kelgenine 180 jyl tolsa, Múrseıit Bikeulynyń týǵanyna – 165 jyl. 1995 jyly jaryq kórgen «Abaı» ensıklopedııasynyń 422 betinde: «Múrseıit (Núrseıit) Bikeuly 1860 jyly týǵan, 1917 jyly ómirden ótken. Abaı óleńderin qaǵazǵa túsirip, búgingi urpaqqa jetkizýge orasan zor eńbek sińirgen. Múrseıittiń jetinshi atasy – Ánet baba, Abaıdyń jetinshi atasy Áıtekpen birge týysady. Múrseıit áýeli Semeıde orys mektebinde tórt jyl oqyp, keıin Buharada bilim alǵan. Semeı oıazynyń keńsesinde tilmash ári pısar, mektepte muǵalim bolǵan. Abaı ony aýylyna aldyryp, bala oqytqan», delinipti.
Jazýshy Muhtar Áýezov «Múrseıittiń eńbegi asyl mura» dese, akademık Álkeı Marǵulan «Múrseıit bolmasa, Abaı shyǵarmalarynyń jaryq kórýi qıyn bolar edi», dep joǵary baǵa beripti.
Al 1957 jyly jaryq kórgen joǵarydaǵy ekitomdyqtyń alǵy sózin jazǵan Muhtar Áýezov: «Múrseıit jazyp qaldyrǵan Abaı shyǵarmalarynyń úsh qoljazbasy bar. Munyń birinshisi 1905 jyly qaǵazdyń eki jaq betine qatar jazylǵan qalyń dápter. Nómirlengen bet sany – 200. Biraq arasynda keıbir better túsip joǵalyp ketken. Ekinshi qoljazba – 1907 jyly qaǵaz betine túsken. Bul da qaǵazdyń eki jaq betine birdeı jazylǵan. Nómirleýi boıynsha 232 bet. Munda da túsken, joǵalǵan better bar. Úshinshisi – 1910 jylǵy qoljazba. Bul da dápterdiń eki betine qatar jazylǵan. Bet sany – 204.
1907 jáne 1910 jylǵy qoljazbanyń ekeýi de qara sózderden bastaldy. Kóshirmeniń úsheýi de arabtyń eski emlesimen, bir kisiniń qolymen jazylǵan. Qoljazbanyń birinde bar, ekinshisinde joq shyǵarma óte az kezdesedi. Negizinde úsh qoljazba birin-biri qaıtalaıdy», dep jazypty.
Osy oqıǵa týraly Árham Ysqaqulynyń esteliginde: «1905 jyly jaz shyǵyp kıiz úı tikkende Kákitaı «Abylaısha» qos tikkizip, Múrseıit mollany shaqyrtyp alyp: sen myna biz jınaǵan Abaı óleńderin rettep jaz dep, ońasha qosqa otyrǵyzady. Múrseıit asyqpaıtyn, sulý jazatyn adam edi», dese, Ýásıla Maǵaýııaqyzynyń esteliginde, ótken ǵasyr basynda Alash qaıratkeri Álıhan Bókeıhannyń atsalysýymen 1909 jyly Peterbor qalasynda I.Boraganskııdiń baspahanasynan basylyp shyqqan «Abaıdyń alǵashqy kitaby» osy Múrseıit qoljazbasy negizinde jaryq kórgen deıdi.
