- Eń aldymen, týǵan qalama elimizdiń eń qıyn kezeńderiniń birinde qyzmet etýge senim men múmkindik bergeni úshin Memleket basshysy Qasym-Jomart Kemeluly Toqaevqa shyn júrekten rızashylyǵymdy bildiremin. Bul men úshin erekshe mártebe jáne úlken jaýapkershilik boldy.
Alǵashqy jumys kúnnen bastap osy joǵary senimdi aqtaý úshin barlyq bilimim men tájirıbemdi salyp, Almatyny turaqty damý jolyna shyǵarýǵa tyrystym. О́tken úsh jyldan astam ýaqyt men úshin kúrdeli synaqtar men mańyzdy jetistikterge toly kezeń boldy. Qalanyń damýyna jáne turǵyndardyń ómir súrý sapasyn arttyrýǵa baǵyttalǵan naqty ózgerister ýaqytyna aınaldy, - degen qalanyń burynǵy basshysy.
Onyń dereginshe, Memleket basshysynyń tapsyrmasymen jáne tikeleı qoldaýymen Almatynyń bolashaq damýyn aıqyndaıtyn 20-dan astam strategııalyq qujat qabyldandy. Atap aıtqanda, Almaty qalasynyń 2030 jylǵa deıingi damý baǵdarlamasy, Almatynyń 2040 jylǵa deıingi jańa Bas jospary, qalanyń kólik karkasynyń Master-plany jáne t.b. mańyzdy qujattar.
Sońǵy 3 jylda qalanyń búkil ınjenerlik ınfrastrýktýrasyn aýqymdy modernızasııalaý bastaldy. 540 km sý qubyry jáne káriz júıeleri jańartyldy, 75 km jańa jol salynyp, 650 km jol jóndeldi.
- Prezıdentimizdiń týǵan qalasyn damytý men jańǵyrtýǵa kórsetken tikeleı qoldaýynyń, almatylyqtardyń turaqty nazary men belsendi qoldaýynyń arqasynda biz Almatynyń ornyqty áleýmettik-ekonomıkalyq damýy úshin berik negiz qaladyq. О́tken úsh jylda Almaty ekonomıkasy 20%-dan astamǵa ósip, 29 trln teńgeden asty. Al Almaty bıýdjetiniń kirisi 2022 jyldyń basymen salystyrǵanda 2,2 eseden astam ósip, 2,5 trln teńgege jetti.
Bizdiń basty mindetimiz – almatylyqtardyń ómir sapasyn jaqsartý. Bul eń aldymen áleýmettik ınfrastrýktýrany aýqymdy damytý, mektepter men balabaqshalar salý arqyly júzege asyryldy. Bul másele Prezıdentimizdiń turaqty baqylaýynda. Sońǵy úsh jyldan astam ýaqytta qalamyzda 57 oqý orny salynyp, jańartyldy (jalpy sany 2022 jyly 416 bilim berý uıymynan 434-ke jetkizildi). Sonymen qatar, 12 densaýlyq saqtaý nysany salyndy jáne jańǵyrtyldy.
Bizdiń jumysymyzdyń mańyzdy baǵyty Almaty ekonomıkasyn ártaraptandyrý boldy. Úsh jyldan astam ýaqyt ishinde 5 trln teńgeden astam qarajat tartyldy, qala ekonomıkasyndaǵy shaǵyn jáne orta bıznestiń úlesi alǵash ret 60%-dan asty, al Almatydan EAEO elderine daıyn ónim eksporty 3 esege ósip, 2024 jyldyń qorytyndysy boıynsha 2 mlrd AQSh dollarynan asty, - deıdi E.Dosaev.
Ol bul nátıjelerge Memleket basshysynyń, almatylyqtardyń turaqty qoldaýynyń jáne qalanyń naǵyz kásibı mamandary men patrıottarynan quralǵan komandanyń jumysynyń arqasynda ǵana qol jetkizilgenin atap ótedi.
- Búgin, osy múmkindikti paıdalana otyryp, qıyn-qystaý sátterde belsendi atsalysyp, qoldaý kórsetkenderińiz úshin sizderdiń barshańyzǵa shyn júrekten raqmetimdi aıtqym keledi.
Men ómir súrý sapasy joǵary jáne jaıly qalalyq ortasy bar eń zamanaýı ári damyǵan megapolıs retinde Almatynyń bolashaǵyna shyn júrekten senemin, - degen burynǵy ákim.
