Mınıstrdiń aıtýynsha, sábıler týǵan sátinen bastap 4 myńnan astam pedıatr, 1 myńnan astam neonatolog jáne jergilikti dárigerler tarapynan únemi baqylaýda bolady. Sonymen qatar 7 mıllıonnan astam bala tegin medısınalyq kómekke qol jetkizse, jyl saıyn 2 mıllıonnan astam bala skrınıngten ótedi. Sondaı-aq 4,5 mıllıonnan astam bala profılaktıkalyq qarap-tekserýmen qamtylady, 1,5 mıllıonnan astam balaǵa ımmýndaý júrgiziledi.
«Búginde árbir mektep belgili bir emhanaǵa bekitilgen, onda 6,5 myńnan astam medısınalyq pýnkt jumys isteıdi. Bul balalardyń densaýlyǵyndaǵy máselelerdi der kezinde anyqtap, kómek kórsetip, aýrýlardyń aldyn alýǵa múmkindik beredi», dedi Aqmaral Álnazarova.
Esterińizge sala keteıik, osy jyldan bastap Memleket basshysynyń tapsyrmasy boıynsha Qazaqstanda mekteptegi tamaqtanýdyń jańa ulttyq standarty engizilip jatyr. Ol ǵylymı usynymdar, ósip kele jatqan organızmniń qajettilikteri men salaýatty ómir salty qaǵıdattary negizinde ázirlengen.
«Biz balalar densaýlyǵy ınfraqurylymyn damytý, erte dıagnostıkany kúsheıtý, neonataldyq kómek, onkopedıatrııa, ońaltý jáne pallıatıvtik qoldaýǵa ozyq tehnologııalardy engizý jumysyn jalǵastyryp kelemiz. 2025 jyldan bastap emhanalarda erte aralasý ortalyqtary ashylady, olar kómekke muqtaj barlyq balalardy qoldaýmen qamtamasyz etý úshin jumys isteıdi», dedi mınıstr.
Sonymen qatar «Bolashaqqa – saý tispen» baǵdarlamasy sheńberinde elimizdegi barlyq mektepterde mindetti stomatologııalyq qarap-tekserý men tisjegi damýynyń aldyn alý sharalary engizilgen.
«Men, pedıatr-dáriger jáne mınıstr retinde, balanyń densaýlyǵy — bul onyń tolyqqandy damýynyń, ómirdegi jetistiginiń jáne búkil ulttyń bilimi men kúshiniń negizi ekenin jaqsy bilemin», dedi Densaýlyq saqtaý mınıstri Aqmaral Álnazarova.
