Foto: Úkimettiń baspasóz qyzmeti
Kezdesýde «Teńiz–Novorossıısk» baǵyty boıynsha munaı qubyryn jańǵyrtý qarqyny men qoldanystaǵy jáne bolashaǵy bar ınvestısııalyq baǵdarlamalardy jańǵyrtý qarqyny qaralǵan. Nıkolaı Gorban 2024 jyldyń nátıjeleri boıynsha aqparat berip, «Kropotkınskaıa» munaı aıdaý stansasyndaǵy qalpyna keltirý jumystarynyń aıaqtalǵanyn habarlady.
Sondaı-aq, «QazTransOıl» AQ men KQK arasyndaǵy áriptestik aıasynda 2024 jyly eki júıeni baılanystyratyn jańa munaı qubyrynyń qurylysy aıaqtalyp, paıdalanýǵa berilgeni aıtyldy. Bul joba T.Qasymov atyndaǵy munaı aıdaý stansasyn KQK qubyryna qosýǵa múmkindik berdi.
«Búginde aıdaý kólemin jylyna 67 mln tonnadan 81,5 mln tonnaǵa deıin, onyń ishinde qazaqstandyq ýchaske boıynsha jylyna 53,7 mln tonnadan 72,5 mln tonnaǵa deıin arttyrýǵa tehnıkalyq múmkindik qamtamasyz etildi. KQK munaı qubyrynyń «tar» tustaryn joıý jobasyn iske asyrý nátıjesinde bıylǵy qazan aıynda munaı jóneltý kólemin 1 mlrd tonnaǵa deıin jetkizý josparlanyp otyr», delingen habarlamada.
Premer-mınıstr Oljas Bektenov KQK qubyrynyń Qazaqstan munaı eksporty úshin strategııalyq mańyzyn atap ótip, Úkimet tarapynan barlyq qajetti qoldaý kórsetiletinin jetkizdi.
Kezdesýde konsorsıýmnyń áleýmettik jaýapkershiligi de nazardan tys qalmady. Atap aıtqanda, Atyraý qalasynda 900 oryndyq mektep salý jumystary júrgizilip jatyr. О́tken jyly KQK tarapynan áleýmettik jobalarǵa 4,4 mlrd teńge bólingen. Al 2025 jyly bilim berý men medısınalyq ınfraqurylymdy damytýǵa baǵyttalǵan jańa jobalar qolǵa alynbaq.
Kelissózder qorytyndysynda taraptar munaı tasymaly salasyndaǵy ózara is-qımyldy odan ári nyǵaıtýǵa nıetti ekenin bildirdi.
