Sýretti túsirgen – Erlan OMAR, «EQ»
Bıyl jyl basynan beri 1 249 azamat jeńildetilgen zaım aldy. Atalǵan jeńil nesıe halyqqa «Otbasy banki» turǵyn úı qurylys banki arqyly beriledi. Bul týraly Ortalyq kommýnıkasııalar qyzmetinde ótken baspasóz máslıhatynda О́nerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov málimdedi. Ol el turǵyndaryn turǵyn úımen qamtamasyz etý men osy jyly atqarylatyn jumystar týraly aıtyp berdi.
«Qurylys salasy – el ekonomıkasynyń negizgi salalarynyń biri. 2024 jyly respýblıka kóleminde 18,9 mıllıon sharshy metrden astam jańa turǵyn úı paıdalanýǵa berilip, bul shamamen 170 myńnan astam turǵyn úıge teń boldy. Memlekettik ınvestısııa arqyly 30 myńnan asa páter salyndy. Sondaı-aq 9 myńǵa jýyq jeńildetilgen zaım berildi. Bıyl da turǵyn úı salýdy jalǵastyrý jáne azamattardy turǵyn úımen qamtamasyz etýdiń qosymsha sharalaryn engizý josparlanǵan. Sonyń aıasynda kredıttik turǵyn úıdiń 12 myń páterin salý jáne 5 myńnan astam jalǵa beriletin turǵyn úı satyp alý kózdelýde», dedi
B.Júnisbekov.
Búginde elimizde turǵyn úı kezeginde 650 myńnan asa adam bar. Bul azamattarǵa jalǵa beriletin turǵyn úı satyp alý quqyǵymen beriledi, onyń keminde 20%-y jetim balalarǵa arnalǵan. 2022 jyldan bastap turǵyn úıdi jaldaý qunynyń 50%-yn sýbsıdııalaý engizildi. Bul birinshi jáne ekinshi toptaǵy múgedekter, jetim balalar, kópbalaly otbasylar sııaqty topqa baǵyttalǵan.
Búginde 11 myńǵa jýyq otbasy turǵyn úıdi jalǵa alý boıynsha memlekettik qoldaý alady. Odan bólek, ákimdikter turǵyn úı sertıfıkattary arqyly ıpotekalyq nesıelerdiń bastapqy jarnasyn jabýǵa kómektesedi. Byltyr 2 300-den, al bıylǵy alǵashqy toqsanynda 500-den astam sertıfıkat berilgen.
Turǵyn úı jaǵdaıyn jaqsartýǵa memlekettik qoldaýdyń qosymsha sharasy – jeńildetilgen ıpotekalyq nesıe berý. Kezekte turǵan azamattarǵa 2% jáne 5% mólsherlemesi boıynsha zaımdar beriledi. Byltyr 3 800-den astam adamnyń qoly jeńildetilgen zaımǵa jetse, bıylǵy tórt aıda myńǵa jýyq azamat turǵyn úı satyp alý úshin zaım aldy. «Naýryz» ıpotekalyq baǵdarlamasy aıasynda áleýmettik osal toptar úshin jyl saıyn 12 myń zaım berý josparlanǵan. Al bıylǵy tórt aıda 1 500-den asa adam bul baǵdarlamanyń artyqshylyǵyn paıdalandy.
