Konferensııa jumysyna Premer-mınıstrdiń keńesshisi Eraly Toǵjanov, Májilistegi «Aýyl» partııasy fraksııasynyń alǵashqy jetekshisi, akademık Orazaly Sábden, memleket jáne qoǵam qaıratkeri Ǵanı Qasymov, Parlament depýtattary men elimizdegi ózge de saıası partııalardyń jetekshileri, Sý resýrstary jáne ırrıgasııa mınıstri Nurjan Nurjigitov, sondaı-aq birqatar mınıstrliktiń ókilderi qatysty. Sondaı-aq Alma Shúkijanova, Elmara Traısova, Alına Soloveva syndy Qazaqstannyń Eńbek erleri de boldy.
Jıyn basynda partııanyń 25 jyldyq mereıli datasyna arnaıy daıyndalǵan «Aýyl – el bolashaǵy» atty shaǵyn fılm kórsetildi. Sondaı-aq «Aýyl» partııasynyń qalyptasý kezeńinde qyzmet etken tanymal qoǵam qaıratkerleri men partııa ardagerleriniń baıandamalary arqyly elimizdegi kóppartııalyq saıası júıeniń qalyptasyp, damý kezeńderine sholý jasalyp, belgili saıasattanýshy ǵalymdardyń saraptamalyq zertteýleri tanystyryldy.
Konferensııa barysynda partııa tóraǵasy, Májilistegi agrarlyq máseleler komıtetiniń tóraǵasy Serik Egizbaev «Aýyl» partııasy: 25 jyl belesi» taqyrybynda baıandama jasady. Májilis depýtaty partııanyń qurylý tarıhynan bastap, osy kezge deıingi júrip ótken jolyna sholý jasap, búgingi bastamalary men keleshek josparlaryna toqtaldy.
– «Aýyl» partııasy aýyldyq óńirlerdiń múddelerin qorǵaý men damytý maqsatynda 2000 jyldyń 29 naýryzynda sharýalardyń sosıal-demokratııalyq partııasy bolyp quryldy. Partııaǵa eldegi aýylǵa jany ashıtyn ǵalymdar, jazýshylar jáne zııaly qaýym ókilderiniń basym bóligi múshelikke kirdi. Ábdijámil Nurpeıisov, Sherhan Murtaza, Farıza Ońǵarsynova, Dýlat Isabekov sııaqty ádebıetimizdiń kórnekti ókilderi sol kezdegi «Aýyl» partııasynyń Saıası keńesine saılanyp, Nurǵalı Núsipjanov, Altynbek Qorazbaev jáne taǵy da basqa tanymal mádenıet ókilderi «Aýyl» partııasy músheleriniń qatarynan tabyldy. «Aýyl» degen ataýmen jańa partııanyń qurylýy qazaq qoǵamynda úlken jańǵyryq týǵyzdy, – dedi S.Egizbaev.
Onyń aıtýynsha, partııa qurylǵan 2000 jyly onyń quramynda 5 myń adam bolsa, eki jyl ishinde músheler sany 12 ese artyp, 2003 jyly 60 myńnan asypty.
– Shırekǵasyrlyq tarıhynda «Aýyl» partııasy óziniń negizgi saıası, ıdeologııalyq baǵyttarynan eshqashan bas tartqan emes. Partııamyz qaı kezeńde bolsyn, aýyldyq aımaqtardyń, aýyl sharýashylyǵynyń máselelerin kóterip, olardyń sheshilýi úshin naqty qadamdar jasady. Tarıhqa júginsek, partııa 2003–2005 jyldarǵa arnalǵan 3 jyldyq «Aýyl» memlekettik baǵdarlamasynyń qabyldanýyna bastamashy bolǵan. Jyl saıyn aýyl sharýashylyǵy taýaryn óndirýshilerge paıyzsyz qarajattyń bólinýi de bizdiń partııamyzdyń bastamasymen qolǵa alyndy, «Aýyl sharýashylyǵy seriktestikteri men qaýymdastyqtary týraly», «Astyq týraly», «Qazaqstan Respýblıkasynda asyl tuqymdy mal sharýashylyǵyn damytý týraly», «Sý paıdalaný týraly» jáne basqa da zańdardyń qabyldanýyna yqpal etti, – dedi partııa tóraǵasy.
S.Egizbaev partııanyń endigi basty mejesi elimizdi agrarlyq derjavaǵa aınaldyrý ekenin atap ótti. Iаǵnı qala men aýyldyń damý barysyn qustyń qos qanatyndaı teń ustaý kerektigin alǵa tartty. Bul maqsat partııa saıası baǵdarlamasynyń «Ekonomıkalyq strategııa» bóliminde kórinis tapqan.
Sondaı-aq mereıli dataǵa oraı konferensııa aıasynda Q.Qýanyshbaev atyndaǵy Qazaq ulttyq mýzykalyq-drama teatrynda Sh.Aıtmatovtyń «Qyzyl oramaldy shynarym» atty spektakli kórsetildi. Qoıylymdy partııa tóraǵasy Serik Egizbaev bastaǵan Májilistegi «Aýyl» partııasy fraksııasynyń depýtattary, partııa ardagerleri, qurmetti qonaqtar jáne elimizdiń barlyq óńirinen kelgen delegattar tamashalady.
