OSK bastamasymen alǵash ret Eýropadaǵy qaýipsizdik jáne yntymaqtastyq uıymynyń (EQYU) Demokratııalyq ınstıtýttar jáne adam quqyqtary jónindegi bıýrosynyń (DIAQB) dırektory Marııa Telalıanmen kezdesý Varshava qalasyndaǵy EQYU DIAQB-nyń shtab-páterinde ótti. Kezdesý barysynda OSK tóraǵasy Nurlan Ábdirov Marııa Telalıandy osy qyzmetine jaqynda ǵana taǵaıyndalýymen quttyqtap, tabys tiledi. Sondaı-aq ol Qazaqstannyń EQYU DIAQB-men syndarly dıalogti dástúrli túrde joǵary baǵalaıtynyn jáne onyń baıqaý mıssııalarynyń qorytyndy usynymdaryna muqııat qaraıtynyn atap ótti.
«Biz bıýro usynymdaryn OSK janyndaǵy Sarapshylyq keńeste azamattyq qoǵam ókilderiniń, onyń ishinde Jas saılaýshylar klýbynyń jáne Múgedektigi bar adamdardyń saılaý quqyqtary jónindegi jumys tobynyń qatysýymen júıeli túrde talqylaımyz», dedi OSK basshysy.
N.Ábdirov EQYU DIAQB-men yntymaqtastyq Qazaqstanǵa basqa elderdegi saılaýlardy baıqaýǵa ǵana emes, sonymen qatar DIAQB-nyń uzaq jáne qysqamerzimdi mıssııalary aıasynda baıqaýshy retinde qatysýǵa múmkindik beretinin aıtty. Bul Qazaqstannyń halyqaralyq konferensııalarǵa qatysýyna jol ashady jáne elektoraldyq ózgerister úderisinde belsendi bolýǵa múmkindik beredi.
Buǵan qosa ol Prezıdent Qasym-Jomart Toqaevtyń bastamashylyq etken konstıtýsııalyq reformalar aıasynda Qazaqstandaǵy saılaý júıesiniń transformasııasy týraly keńinen baıandap, bul ózgerister qoǵam suranysyna negizdelgenin atap ótti. Osynaý transformasııa EQYU DIAQB basshylyǵynyń qyzyǵýshylyǵyn týǵyzdy.
«Eń aldymen, bul sapardyń óte paıdaly bolǵanyn aıtýym kerek. Ol Qazaqstannyń Ortalyq saılaý komıssııasy saılaýdy baıqaý máseleleri boıynsha DIAQB-men syndarly dıalog júrgizýge shynymen de nıetti ekenin dáleldeıdi. Bul kezdesý bolashaqta da yntymaqtastyqty jalǵastyrýǵa daıyndyq bar ekenin aıqyn kórsetti. Biz mundaı ózara is-qımyldy damytý áleýetin kórip otyrmyz», dedi M.Telalıan.
Kezdesý barysynda taraptar saraptamalyq konsýltasııalardy turaqty túrde ótkizýge nıetti ekenin rastady. Sonymen qatar saılaýdy uıymdastyrý, monıtorıng júrgizý tájirıbesi jáne Astanadaǵy EQYU baǵdarlamalar keńsesimen ózara is-qımyl máseleleri talqylandy.
Sondaı-aq Nurlan Ábdirov osy sapary barysynda Polsha Respýblıkasynyń Ulttyq saılaý komıssııasynyń tóraǵasy Sılvestr Marchınıakpen kezdesti. Kezdesý barysynda OSK tóraǵasy 2025 jylǵy 18 mamyrda ótken prezıdenttik saılaýdyń birinshi týrynyń sátti ótýimen áriptesin quttyqtady.
Buǵan qosa saılaý naýqandary kezindegi jalǵan aqparat pen dıpfeıkterge qarsy kúres taqyrybyna erekshe nazar aýdaryldy. N.Ábdirov osy baǵyttaǵy tájirıbe almasýǵa múddelilik tanytyp, sıfrlyq ortadaǵy zamanaýı qaýipterge qarsy tura alatyn turaqty tetikter qalyptastyrýdyń mańyzyn atap ótti.
Taraptar elektoraldyq ózekti máseleler boıynsha saraptamalyq konsýltasııalar ótkizýdi qosa alǵanda ekijaqty yntymaqtastyqty keńeıtý múmkindikterin talqylady.
Kezdesý sońynda qazaqstandyq delegasııa polıak áriptesterine OSK ázirlegen ǵylymı basylymdardy, onyń ishinde aǵylshyn tilindegi «Qazaqstan Respýblıkasy Ortalyq saılaý komıssııasyna – 30 jyl. Qazaqstan Respýblıkasy saılaý júıesiniń transformasııasy» atty monografııany jáne «Konstıtýsııalyq reforma jáne saılaý júıesi» halyqaralyq konferensııasynyń materıaldar jınaǵyn tabystady.
Sondaı-aq OSK tóraǵasy Polshadaǵy prezıdenttik saılaýdy baıqaý boıynsha EQYU DIAQB mıssııasynyń baspasóz konferensııasynyń jumysyna qatysty.
