Sýret: primeminister.kz
Jınalys barysynda depýtattarǵa Memleket basshysynyń Almaty qalasynyń ákimi laýazymyna eki kandıdatty – Prezıdent Ákimshiligi basshysynyń birinshi orynbasary Darhan Satybaldy men Almaty qalasy ákiminiń orynbasary Beıbit Shahanovty usyný týraly haty oqyldy.
Ashyq daýys berý qorytyndysy boıynsha 32 depýtattyń 23-i Darhan Satybaldynyń kandıdatýrasyna daýys berdi. Beıbit Shahanovtyń kandıdatýrasyn 9 depýtat jaqtady.
Prezıdenttiń tıisti Jarlyǵymen Darhan Satybaldy Almaty qalasynyń ákimi bolyp taǵaıyndaldy.
Qala aktıvimen kezdesýde Premer-mınıstr Memleket basshysy Qasym-Jomart Toqaevtyń atynan Erbolat Dosaevqa qalanyń qarjy-ekonomıkalyq áleýetin damytý jónindegi belsendi jumysy úshin alǵysyn bildirdi. 2024 jyly qalanyń Qazaqstannyń IJО́-ge qosqan úlesi 21,8%-ǵa deıin ósti. Megapolıste Prezıdenttiń tapsyrmasy boıynsha bıýdjetti ortalyqsyzdandyrý, abattandyrý, jańa áleýmettik nysandar salý taǵy basqa jumystar júrgizilip keledi.
Premer-mınıstr qala aktıvine jańa ákim Darhan Satybaldyny tanystyra kele, Memleket basshysynyń Almaty ákimdiginiń aldyna qalanyń áleýmettik-ekonomıkalyq damýyn qamtamasyz etý jáne ekonomıka qurylymyn ártaraptandyrý, ınjenerlik ınfraqurylymdy odan ári jańǵyrtý jáne qoǵamdyq keńistikterdi keńeıtý boıynsha mindetter qoıylǵanyn atap ótti. Sondaı-aq jol-kólik júıesi, ekologııa, óńdeý ónerkásibi, týrızm, IT-sektor, kreatıvti ındýstrııa salasynda tapsyrmalar berildi.
