Qorshaǵan ortany endi ǵana tanyp-bilip jatqan balpanaqtaı baladan qandaı da bir aýrý belgilerin anyqtaý qıynnyń-qıyny. Anyqtaǵan kúnniń ózinde keshe ǵana dúnıe esigin ashqan balaǵa jyldam operasııa jasaý asqan eptilikti qajet etedi. Jaǵdaı bylaı bolǵan. Balada aldymen ınfeksııalyq aýrýdyń belgilerin baıqaǵan. Sábıdiń boıyn álsizdik dendep, jıi qusqan. Sodan balanyń ata-anasy úreılenip dárigerge júgingende, bóbek aq jeleńdilerdiń kóz aldynda esinen tanypty. Bul kez medısına mamandary bir mınýt ta ýaqyt joǵaltpaı jedel áreket etýge kirisken. Balany kompıýterlik tomografııaǵa túsiredi. Sábıdiń mıyndaǵy úlken isikti dárigerler osylaı birden anyqtaǵan.
Mundaı kúrdeli dıagnozdyń emi operasııa ekenin jaqsy biletin Jezqazǵan qalasy oblystyq kópbeıindi aýrýhananyń neırohırýrgteri barynsha jedel sheshim qabyldaǵan. Qýanyshqa qaraı, neırohırýrgııa bóliminiń meńgerýshisi Oralbek Mustafın, jas maman Abý Dúısenov bastaǵan dárigerler 3 saǵatqa sozyǵan óte kúrdeli operasııany sátti jasady.
«Operasııadan keıingi kezeń qalypty jaǵdaıda ótti. Bala esin tez jıyp, jarasy tez jazyldy. Jaǵdaıy turaqtanyp, jaqsara bastaǵannan keıin naýqasty úıine shyǵardyq. Ári qaraı balaǵa ońaltý kýrsy qajet. Qazir áke-sheshesi «Ana men bala» ortalyǵynda josparly em alýǵa daıyndyq ústinde. Asqan dáldikti talap etetin asa kúrdeli ota MÁMS esebinen jasaldy»,deıdi neırohırýrg Abý Dúısenov.
Uǵynyńqy bolýy úshin aıta ketsek, MÁMS aıasynda elimizdiń ár aımaǵynda kún saıyn osyndaı nebir kúrdeli operasııalar jasalady. Al, 18 jasqa tolmaǵan balalar MÁMS-te memleket tarapynan saqtandyrylǵan.
