Jıyndy ashqan Prezıdent jýyrda Majarstanda ótken beıresmı sammıtte Uıymǵa múshe memleketter basshylary yntymaqtastyqty tereńdetýdiń mańyzyn rastaǵanyn atap ótti. Tarıf saıasatynyń ózgerýinen týyndaǵan jahandyq ekonomıkanyń transformasııasy jaǵdaıynda munyń máni arta tústi.
Prezıdenttiń aıtýynsha, qazirgi kezdegi kúrdeli ózgerister qıyndyqtarmen qatar jańa múmkindikterge jol ashady. Ásirese, kólik jáne logıstıka, aýyl sharýashylyǵy, sıfrlandyrý men qarjy sııaqty negizgi salalarda kúsh-jigerdi úılestirý qajet.
«Bizdiń elderimizdiń álemdik IJО́-degi jıyntyq úlesi 2010 jylǵy 2,4 paıyzdyq kórsetkishten 3,1 paıyzǵa deıin ulǵaıdy. Túrki memleketteri uıymynyń halyqaralyq rezervteri turaqty túrde ósip keledi. Bul aımaqtyń makroekonomıkalyq ornyqtylyǵynyń artqanyn kórsetedi», dedi Prezıdent.Memleket basshysy qarjy sektoryndaǵy yntymaqtastyqty keńeıtý barysynda ortalyq bankter negizgi ról atqaryp, ekonomıkalyq jáne ınvestısııalyq seriktestiktiń qozǵaýshy kúshine aınala alady dep sanaıdy
«Jıynnyń kún tártibine ekonomıkalyq úderisterge, aqsha-nesıe saıasatyna, sondaı-aq ortalyq bankterdiń sıfrlyq valıýtalary, krıptovalıýtalary jáne sıfrlyq aktıvteri, ıaǵnı, qarjy tehnologııalaryn damytýǵa qatysty ózekti taqyryptardyń engizilgeni qýantady. Qazaqstan bul salada aıtarlyqtaı jetistikke jetti. Atap aıtqanda, barlyq tranzaksııalar qurylymyndaǵy qolma-qol aqshasyz tólemderdiń úlesi 85 paıyzdy qurady. Bizdiń Ulttyq bank aımaqta birinshi bolyp sıfrlyq teńgeni engizdi. Jaqyn arada sıfrlyq aktıvterdiń, sonyń ishinde krıptovalıýtalardyń, steıblkoınderdiń jáne tokenızasııalanǵan quraldardyń qaýipsiz aınalymyn qamtamasyz etetin jańa erejelerdi qabyldaý josparlanyp otyr», dedi Memleket basshysy.
Aıta keteıik, jıynda Qazaqstan Ulttyq bankiniń tóraǵasy Tımýr Súleımenov, Ázerbaıjan Ortalyq bankiniń tóraǵasy Taleh Tahır ogly Kıazımov, Qyrǵyzstan Ulttyq bankiniń tóraǵasy Melıs Týrgýnbaev, Túrkııa Ortalyq bankiniń tóraǵasy Fatıh Karahan, О́zbekstan Ortalyq bankiniń tóraǵasy Tımýr Ishmetov jáne Majarstan Ortalyq bankiniń atqarýshy dırektory Gabor Soch sóz sóıledi.
