Elimizdiń birqatar óńiri, kórshiles Qyrǵyzstannan kelgen ardagerlerdiń basyn qosqan jarystyń ashylý saltanatynda tehnıka ǵylymdarynyń doktorlary Ishenbek Jaqypbekov pen Nurlan Aıtymbetov, Qurmetti qurylysshy Toqmaǵamet Ibragımov, ekonomıka ǵylymdarynyń kandıdaty, professor Qanybek Qaldybaev sóz sóılep, qatysýshylarǵa sáttilik tiledi. Jetisý oblysy bılıard federasııasynyń prezıdenti Toqtar Esimov Jaqsyqul Myrzahmetulyna oblys ákimi men Taldyqorǵan qalasy ákiminiń Qurmet gramotasy, oblystyq Dene shynyqtyrý jáne sport basqarmasy basshysynyń Alǵyshatyn tabys etti.
Jekelegen saıysta Qyrǵyzstannan kelgen «Qara balta» komandasynyń múshesi Oleg Kımge teń keler eshkim bolmady. Ol bas júldemen qatar 150 000 teńgeni enshiledi. Kúmis medal, 100 000 teńge Shymkenttiń «Turan» klýbynyń oıynshysy Alık Mahanovqa buıyrdy. Jergilikti «Koronanyń» marqasqasy Murat Jaılaýbaev qola medal, 50 000 teńgeni ıelendi.
Komandalyq básekede 14 ujym sheberlik baıqasty. Solardyń arasynan Almatynyń «Koronasy» ozyp shyqty. 700 000 teńgeni oljalaǵan jeńimpazdardyń sapynda Qanybek Qaldybaev, Artyqbaı Sanaqulov, Panabek Sarǵaldaqov, Muratqan Sháıdemov, Murat Jaılaýbaev, Valerıı Mýsıenko, Alym Mashýrov syndy bılıardshylar asqan sheberlik tanytty. Olardy jarysqa Ǵabıden Qaıymsultanov baptap ákeldi. Fınalda «Korona» Taldyqorǵannyń «Jetisý-1» klýbyn qapy qaldyrdy. Qyrǵyzstannyń «Qara baltasy» úzdik úshtikti túıindedi.
ALMATY
