Talqylaýǵa QR Oqý-aǵartý mınıstrliginiń ókilderi, óńirlik bala quqyqtary jónindegi ýákil jáne qoǵamdyq keńes músheleri qatysty. Nátıjesinde oqýshy memlekettik jalpy bilim berý mektebine aýystyryldy. Ata-analar bul sheshimge qarsylyq bildirmedi.
«NZM árdaıym oqýshylarǵa adaldyq tanyta otyryp, ózara qurmet pen syndarly qarym-qatynas ustanymdaryn ustanady, alaıda ustazdarǵa degen qurmet máselesinde qatań pozısııany saqtaıdy», dedi Anýar Janǵozın.
Oqý-aǵartý mınıstriniń tapsyrmasymen Almatyǵa Bala quqyqtaryn qorǵaý komıtetiniń tóraǵasy da bardy. Mınıstrlik ókilderiniń, óńirlik ýákil men jurtshylyqtyń qatysýymen ótken kóshpeli kezdesýler barysynda jaǵdaı jan-jaqty taldanyp, ony sheshýdiń joldary qarastyryldy.
QR Oqý-aǵartý mınıstrligi «Pedagog mártebesi týraly» QR Zańyn qatań saqtaýdyń mańyzdylyǵyn eske saldy. Muǵalimdi qurmetteý men qaýipsiz bilim berý ortasyn qamtamasyz etý – bilim berý salasyndaǵy memlekettik saıasattyń buljymas basymdyqtary bolyp qala beredi.
Eske sala keteıik, Almaty qalasyndaǵy Nazarbaev Zııatkerlik mektebiniń 11-synyp oqýshysy toqsandyq qorytyndy baqylaý kezinde akademııalyq adaldyq erejesin buzyp, uıaly telefon qoldanǵan. Al eskertý jasaǵan muǵalimdi balaǵattaǵan. Nátıjesinde oqýshy mektepten shyǵarylyp, jalpy bilim berý mektebine aýystyrylǵan.
