Foto: TJM
Esterińizge sala keteıik, 26 mamyr kúni shahtada sýtegi gazy bólinip, sonyń saldarynan órt shyqqan. Apat kezinde úsh qyzmetker túrli dárejede kúıik alyp, aýrýhanaǵa jetkizilgen edi.
Vıse-mınıstr shahtada bolyp, zardap shekken jumysshylardyń jaǵdaıymen tanysqan. Sol kúni-aq vıse-mınıstrdiń tóraǵalyǵymen shahtada kásiporyn ókilderi men memlekettik organdardyń qatysýymen keńes ótken.
Keńes qorytyndysy boıynsha, О́nerkásiptik qaýipsizdik komıteti tóraǵasynyń orynbasary Keńgirbaı Eseneev basqaratyn arnaıy komıssııa qurylyp, apattyń naqty sebepteri men mán-jaıyn anyqtaý jumystary bastaldy.
«Qaýipsizdik maqsatynda shahtadaǵy barlyq óndiristik jumystar ýaqytsha toqtatylǵan. Bul sheshim sýtegi shyǵaryndylarynyń qaıtalaný qaýpin azaıtý jáne jumysshylardyń ómirin qorǵaý maqsatynda qabyldandy. Budan bólek, bolashaqta mundaı oqıǵalardyń aldyn alý úshin sýtegi men basqa da ilespe gazdardyń bóliný mehanızmin, olardyń taý-ken óndirisine áserin zertteý úshin ǵylymı-zertteý ınstıtýttaryn tartý usynyldy», dep habarlady Tótenshe jaǵdaılar mınıstrliginiń baspasóz qyzmeti.
Aıta keteıik, tergeý qorytyndysy men shahtanyń ary qaraıǵy jumysy jóninde aqparat qosymsha habarlanatyn bolady.
