Oblys ákiminiń orynbasary Qaırat Nurtaevtyń aıtýyna qaraǵanda, munaıly shahardyń soltústiginen aınalyp ótetin joldyń qurylysyn 2026 jyly aıaqtaý josparlanyp otyr. Osy kezge deıin jobaǵa sáıkes 7 shaqyrym joldyń negizgi qabaty salyndy.
«Asfalt jabynynyń astyńǵy qabaty tóseldi. Kópirdiń jáne jol aıryǵynyń qadalary qaǵyldy. Soltústik aınalma jol ózge óńirlerden keletin júk kólikteriniń Atyraý qalasyna kirmeı-aq, Oral, Aqtaý, Aqtóbe jáne Reseı shekarasy baǵytyndaǵy jolǵa shyǵýyna múmkindik beredi. Demek aldaǵy ýaqytta bul joba kólik jáne logıstıka salasynyń ekonomıkalyq turǵydan tıimdiligin arttyrady», deıdi Q.Nurtaev.
Ákim orynbasarynyń málimetinshe, atalǵan joba aıasynda Jaıyq ózeni men Saryózek kanaly ústimen ótetin kópirler salynady. Oǵan qosa úsh jol aıryǵyn salý qarastyrylyp otyr. Jaıyq ózeniniń ústinen salynatyn kópir Atyraý – Oral jáne Atyraý – Inder jolyna qosylady.
«Munaıly óńir turǵyndaryn «Atyraý qalasynan Reseı shekarasyna deıin qatynaıtyn joldyń 5 shaqyrymy qashan salynady?» degen saýal tolǵandyrady. Joldyń bul bóligin birinshi sanatqa aýystyrý maqsatynda oblystyń kommýnaldyq menshigine aldyq. Sodan soń jol bóligin rekonstrýksııalaý úshin jobalyq-smetalyq qujat daıyndaldy. Jobaǵa memlekettik saraptamanyń oń qorytyndysy berildi», dep málimdedi ákim orynbasary.
Jaqynda atalǵan joldyń bóligin jóndeý bastaldy. Atyraý oblystyq jolaýshylar kóligi jáne avtomobıl joldary basqarmasynyń bas mamany Altynbek Beıbitovtiń deregine súıensek, jańǵyrtý jumysynyń merdigeri – «Kazahdorstroı» JShS.
«Buryn joldyń bul ýchaskesi úshinshi sanatta ári ekijolaqty edi. Endi birinshi sanatqa aýystyrylyp, oblystyq jolaýshylar kóligi jáne avtomobıl joldary basqarmasynyń teńgerimine berildi. Bul ýchaskeniń uzyndyǵy – 5 shaqyrym. Onyń ishinde temirjoldyń ústimen ótetin 89,4 metrlik kópir bar. Jańǵyrtý jobasy aıasynda eski kópir tolyq buzylyp, jańadan salynady. Jol tórt jolaq bolady», deıdi A.Beıbitov.
Joba jetekshisiniń orynbasary Áset Bektenovtiń aıtýyna qaraǵanda, joldyń eski qabatyn buzý bastalǵan. Qazir kólik qozǵalysyn toqtatpaý úshin aınalma jol salynyp jatyr. Jol qurylysyna 10 jumysshy, 15 tehnıka tartylǵan.
«Aldymen joldyń ústińgi qabatyn tolyq qazyp alamyz. Al aınalma jol daıyn bolǵan soń, negizgi qurylys jumystary jalǵasady», dep málim etti Á.Bektenov.
Atyraý oblysy
