Degenmen talapkerlerdiń deni memlekettik bilim granty arqyly oqýǵa túskisi keledi. Alaıda grant sany shekteýli. Bıyl Nazarbayev University-ge 2409 bilim granty bólingen. Iаǵnı 10 000 ótinish berýshiniń ishinen tek 2409 adam ǵana grantpen oqýǵa múmkindik alady. Sondyqtan osy jyly oqýǵa suranystyń artýy men memlekettik granttardyń shekteýli bolýyna baılanysty ýnıversıtet aqyly bólimge stýdent tartýdy qolǵa aldy.
NU prezıdenti Vakar Ahmadtyń aıtýynsha, oqý ornyna Qazaqstanda jáne shetelde qyzyǵýshylyqtyń artýyna ýnıversıtettiń álemdik reıtıngterdegi kórsetkishteriniń jaqsarǵany sebep bolǵan.
– Halyqaralyq zertteý ýnıversıtetteriniń reıtıngin anyqtaıtyn «Times Higher Education» (THE) uıymnyń málimetine sáıkes, Nazarbayev University álemdegi eń úzdik oqý oryndarynyń alǵashqy 24 paıyzyna kirdi. Al NU Joǵary bilim berý mektebi Ortalyq Azııadan alǵash bolyp álemniń eń úzdik 200 oqý ornynyń qataryna engen. Osyndaı joǵary reıtıngtiń arqasynda otandyq ýnıversıtetke sheteldikter tarapynan qyzyǵýshylyq artty. Qazir 44 eldegi júzdegen talapkerden oqýǵa ótinish tústi. Onyń ishinde Qytaı, Reseı, AQSh sekildi memleketterden bastap, Ortalyq Azııa men Eýropa elderi bar, – dedi NU prezıdenti.
Sondaı-aq ýnıversıtet ınjenerlik, jasandy ıntellekt, jaratylystaný, áleýmettik jáne gýmanıtarlyq ǵylymdar sııaqty túrli salalardy qamtyǵan zamanaýı akademııalyq baǵdarlamalardyń keń jıyntyǵyn usynady. Bul jahandyq deńgeıge umtylatyn jastardyń ýnıversıtetke qyzyǵýshylyǵyn odan ári arttyrady.
Búginde biregeı oqý orny elimizde bilikti, básekege qabiletti kásibı orta qalyptastyryp otyr. Ýnıversıtetti támamdaǵan túlekterdiń 98 paıyzy jumyspen qamtylǵan. Olardyń 92 paıyzy elimizde qyzmet isteıdi.
Aıta keteıik, qazir NU-da aqyly negizde oqýǵa qujattardy qabyldaý áli júrip jatyr. Ýnıversıtetke deıingi daıyndyq baǵdarlamasyna (Foundation) jáne bakalavrıatqa aldaǵy 12 maýsymǵa deıin, al magıstratýra men doktorantýraǵa osy jyldyń 25 maýsymyna deıin ótinish berýge bolady.
Mıra ABLAEVA
