Foto: gov.kz
Qazirgi ýaqytta Baıqońyr aýdanyndaǵy «Tulpar» saýda ortalyǵynyń aldynda eski úıler men saýda nysandaryn buzý jumysy júrip jatyr. Bıyldyń ózinde bul aýmaq qaıta jańaryp, ornyna jańa qoǵamdyq keńistik ashylady. Turǵyndar úshin jaıaý júrginshiler aımaǵy, demalys oryndary ashylyp, kógaldandyrý jáne jaryqtandyrý jumysy júrgiziledi. Atalǵan jumysty kezeń-kezeńimen júzege asyryp, osy jyldyń sońyna deıin aıaqtaý josparlanǵan.
Taǵy bir qoǵamdyq keńistik Jubanov kóshesinde (Tarhan kóshesinen Pýshkın kóshesine deıingi aralyqta) ashylady.
Gúlzardyń jalpy aýdany 4,5 myń sharshy metrdi quraıdy. Abattandyrý aıasynda aýqymdy kógaldandyrý jumysy júrgizilip, kópjyldyq butalar men iri kóshetter otyrǵyzylady.
Abaı dańǵylynyń Respýblıka dańǵylynan bastap Ýálıhanov kóshesine deıingi aralyǵy eki jaǵynan tolyq abattandyrylady. Abattandyrylatyn aýmaqtyń jalpy kólemi 1,1 gektardy quraıdy. Joba aıasynda kóshe jıhazdary ornatylyp, jaryqtandyrý jumysy qosa atqarylady.
«Saraıshyq shaǵyn aýdanynda (Júrgenov gúlzary) eńbek pen jumysshy mamandyqtardyń mańyzyna arnalǵan arnaıy taqyryptaǵy gúlzar jobasyn iske asyrý bastalǵan. Joba aıasynda kóshege arnalǵan jıhazdar ornatylady, kógaldandyrý jumysy júrgiziledi jáne basqa da abattandyrý sharalary iske asyrylady. Gúlzar tek turǵyndardyń demalys orny ǵana emes, sonymen qatar qoǵam tarapynan eńbekke degen qurmetti arttyrýǵa baǵyttalǵan qalalyq ortanyń mańyzdy elementine aınalady», dep jazdy J.Qasymbek.
Sondaı-aq, Táshenev kóshesiniń boıynda kógaldy oryn ashylyp, 500-den astam aǵash otyrǵyzylǵan. Aýmaǵy tolyqtaı avtomatty sýarý júıesimen jabdyqtalǵan.
