Foto: Ashyq derekkóz
Evgenıı Kochetovtyń aıtýynsha, mádenı ortalyqty qurý – Qazaqstan men Qytaı arasyndaǵy joǵary deńgeıdegi kelisimderdiń nátıjesi.
«Qytaı – Qazaqstan Respýblıkasynyń senimdi dosy, odaqtasy jáne strategııalyq áriptesi. Eki eldi ǵasyrlar boıǵy dostyq, ortaq rýhanı qundylyqtar men berik yntymaqtastyq dástúri baılanystyrady», dedi vıse-mınıstr.
Sondaı-aq ol mádenı-gýmanıtarlyq ózara árekettestiktiń qarqyndy damyp kele jatqanyn atap ótti.
«Bul baǵytqa memleket basshylarynyń qos astanada mádenı ortalyqtar ashý týraly bastamasy qosymsha serpin berdi. Qazir bul joba aıaqtalýǵa jaqyn. Bıyl Qazaqstan Respýblıkasynyń Mádenı ortalyǵy Qytaı Halyq Respýblıkasynyń astanasy Beıjiń qalasynda esigin aıqara ashady», dedi ol.
Qazaqstan tarapy óz kezeginde Astanada Qytaı mádenı ortalyǵyn ashýǵa tolyq qoldaý bildirip otyr.
«Bul qadam – halyqtarymyz arasyndaǵy mádenı baılanysty tereńdetip, ózara túsinistikti nyǵaıtýda mańyzdy ról atqaratynyna senimdimiz», dedi Kochetov.
Sonymen qatar, ol BAQ salasyndaǵy yntymaqtastyqtyń artyp kele jatqanyn atap ótti.
«Qazaqstandyq telearnalar Qytaıdyń jetekshi aqparat quraldarymen, onyń ishinde Sınhýa agenttigi men Jenmın jıbao gazetimen sátti yntymaqtastyq ornatyp otyr. Biz árdaıym seriktestikke, dıalogqa jáne ózara tıimdi baılanysqa ashyqpyz», dedi vıse-mınıstr.
